نئی دہلی: سماجوادی پارٹی کے رکنِ پارلیمنٹ رام گوپال یادو نے جمعہ کے روز دعویٰ کیا کہ اعلیٰ سرکاری افسران وزیرِاعظم کو ایل پی جی (کھانا پکانے والی گیس) کی دستیابی کے بارے میں غلط معلومات فراہم کر رہے ہیں، جس کی وجہ سے حکومت کے دعوؤں اور زمینی حقیقت میں واضح فرق نظر آ رہا ہے۔

رام گوپال یادو نے کہا، “وزیرِاعظم کو افسران درست معلومات نہیں دے رہے، اسی لیے وہ یہ دعویٰ کر رہے ہیں کہ ایل پی جی کی کوئی کمی نہیں ہے۔ اگر حقیقت دیکھنی ہو تو زمین پر آ کر دیکھیں، لوگ لمبی قطاروں میں کھڑے ہیں۔ گزشتہ روز وزیرِاعظم نریندر مودی نے قومی دارالحکومت میں بھارت منڈپم میں منعقدہ این ایکس ٹی کانکلیو سے خطاب کرتے ہوئے کہا کہ ملک میں توانائی تک رسائی بڑھانے کے لیے بنیادی ڈھانچے کو مضبوط بنایا جا رہا ہے۔

انہوں نے کہا کہ بھارت صرف بیرونی ذرائع پر انحصار نہیں کرنا چاہتا، اسی لیے توانائی کے شعبے میں خود کفالت پر زور دیا جا رہا ہے۔ وزیرِاعظم نے کہا کہ ان دنوں ایل پی جی کے بارے میں کافی بحث ہو رہی ہے اور کچھ لوگ خوف و ہراس پھیلانے کی کوشش کر رہے ہیں۔ انہوں نے کہا کہ وہ اس معاملے کو سیاسی رنگ نہیں دینا چاہتے، لیکن ایسے اقدامات سے ملک کو نقصان پہنچ سکتا ہے۔

ان کے مطابق جنگ کے باعث پیدا ہونے والے عالمی بحران کے اثرات سے کوئی بھی ملک مکمل طور پر محفوظ نہیں ہے اور بھارت بھی اس سے متاثر ہوا ہے، تاہم حکومت اس بحران سے نمٹنے کے لیے ہر ممکن کوشش کر رہی ہے۔ وزیرِاعظم نے مزید بتایا کہ حال ہی میں انہوں نے دنیا کے کئی ممالک کے رہنماؤں سے اس مسئلے پر بات چیت کی ہے اور سپلائی چین میں پیدا ہونے والی رکاوٹوں کو دور کرنے کے لیے مسلسل اقدامات کیے جا رہے ہیں۔

ادھر بدھ کے روز دہلی حکومت نے وضاحت کی کہ قومی دارالحکومت میں ایل پی جی، پیٹرول، ڈیزل اور پی این جی کی سپلائی معمول کے مطابق ہے اور کسی قسم کی کمی نہیں ہے۔ حکومت نے شہریوں سے اپیل کی کہ گیس کی فراہمی سے متعلق گردش کرنے والی افواہوں پر توجہ نہ دیں اور غیر ضروری گھبراہٹ یا ذخیرہ اندوزی سے گریز کریں۔ اسی دن دہلی کے چیف سیکریٹری کی سربراہی میں ایک اہم جائزہ اجلاس بھی منعقد ہوا جس میں محکمہ خوراک، سپلائیز و صارفین امور، دہلی پولیس، محکمہ ریونیو، اندرپرستھ گیس لمیٹڈ اور مختلف آئل مارکیٹنگ کمپنیوں کے اعلیٰ حکام نے شرکت کی۔

اجلاس میں مغربی ایشیا میں جنگ جیسے حالات کے باعث ایل پی جی کی سپلائی متاثر ہونے کی افواہوں کا تفصیلی جائزہ لیا گیا۔ اندرپرستھ گیس لمیٹڈ کے حکام نے اجلاس کو بتایا کہ وزارتِ پیٹرولیم و قدرتی گیس نے 9 مارچ کو ایک حکم نامہ جاری کیا ہے جس میں گھریلو پی این جی اور سی این جی کی ترجیحی شعبوں میں منصفانہ تقسیم اور دستیابی کو یقینی بنانے کے لیے رہنما اصول دیے گئے ہیں۔

حکام نے واضح کیا کہ دہلی میں گھریلو پی این جی کی کوئی کمی نہیں ہے۔ ترجیحی سپلائی میں تبدیلی کے بعد صنعتی شعبوں کو بھی تقریباً 80 فیصد بلا تعطل گیس کی فراہمی بحال کر دی گئی ہے۔ دریں اثنا، ایران، امریکہ اور اسرائیل کے درمیان جاری تنازع کے باعث آبنائے ہرمز کے ذریعے درآمدات رکنے سے ایل پی جی کی قلت کے خدشات بڑھ گئے ہیں۔

تاہم ایرانی حکام نے بھارتی پرچم بردار جہازوں کو محفوظ گزرنے کی اجازت دے دی ہے، جب کہ خطے میں سمندری آمد و رفت زیادہ تر معطل ہے۔ اسی دوران لائبیریا کے پرچم تلے چلنے والا آئل ٹینکر شین لونگ سویز میکس، جو سعودی خام تیل لے کر آ رہا تھا، بدھ کو دوپہر ایک بجے ممبئی پورٹ پہنچا۔ ایران اور امریکہ کے درمیان کشیدگی شروع ہونے کے بعد آبنائے ہرمز سے گزر کر بھارت پہنچنے والا یہ پہلا جہاز ہے۔