نئی دہلی: (بی جے پی) کے رکنِ پارلیمنٹ نشی کانت دوبے نے کانگریس کے رکنِ پارلیمنٹ اور لوک سبھا میں قائدِ حزبِ اختلاف راہل گاندھی کی رکنیت ختم کرنے کا مطالبہ کرتے ہوئے ایوان میں ایک تجویز پیش کی ہے۔ یہ قدم ایسے وقت اٹھایا گیا ہے جب راہل گاندھی نے بھارت-امریکہ عبوری تجارتی معاہدے اور مرکزی بجٹ کے حوالے سے حکومت پر سخت تنقید کی ہے۔

بی جے پی رکن نشی کانت دوبے نے جمعرات کو کہا کہ انہوں نے لوک سبھا میں ایک تجویز پیش کی ہے۔ ان کا الزام ہے کہ راہل گاندھی ملک کو گمراہ کر رہے ہیں۔ دوبے کے مطابق انہوں نے اپنی تجویز میں مطالبہ کیا ہے کہ اس معاملے پر بحث کی جائے، راہل گاندھی کی پارلیمانی رکنیت ختم کی جائے اور انہیں تاحیات الیکشن لڑنے سے روکا جائے۔

تاہم دوبے نے واضح کیا کہ راہل گاندھی کے خلاف استحقاق کی تحریک (پریولیج موشن) لانے کا کوئی منصوبہ نہیں ہے۔ ان کا کہنا تھا کہ یہ ایک علیحدہ تجویز ہے جس میں گاندھی کو پارلیمنٹ سے معطل کرنے کا مطالبہ کیا گیا ہے۔ نشی کانت دوبے نے نیوز ایجنسی اے این آئی سے گفتگو میں کہا کہ انہوں نے اپنی تجویز میں یہ الزام بھی لگایا ہے کہ راہل گاندھی جارج سوروس جیسی بیرونی طاقتوں کی حمایت سے ملک کو گمراہ کر رہے ہیں۔

بدھ کے روز لوک سبھا میں خطاب کرتے ہوئے راہل گاندھی نے الزام لگایا تھا کہ بھارت-امریکہ تجارتی معاہدے میں حکومت نے ملکی مفادات پر سمجھوتہ کیا ہے۔ ان کا کہنا تھا کہ حکومت خود تسلیم کرتی ہے کہ دنیا اس وقت غیر مستحکم دور سے گزر رہی ہے جہاں توانائی اور مالیات کو ہتھیار کے طور پر استعمال کیا جا رہا ہے۔

اس کے باوجود، ان کے مطابق، بھارت نے توانائی کی سلامتی سے متعلق اہم فیصلوں میں امریکہ کو زیادہ اثر و رسوخ دیا ہے۔ بی جے پی کے کئی رہنماؤں نے راہل گاندھی کی تقریر کو تنقید کا نشانہ بنایا اور اسے "نابالغانہ" قرار دیا۔ ان کا کہنا ہے کہ اپوزیشن ملک کی شبیہ کو نقصان پہنچانے کی کوشش کر رہی ہے۔