نئی دہلی/ آواز دی وائس
دہلی کے لال قلعے کے "15 اگست پارک" سے چرائے گئے 1 کروڑ روپے مالیت کے سونے کے کلش کے معاملے میں دہلی پولیس کو بڑی کامیابی ملی ہے۔ کرائم برانچ نے ایک ملزم کو گرفتار کر لیا ہے۔ سی سی ٹی وی فوٹیج کی بنیاد پر اس کی گرفتاری اتر پردیش کے ہاپوڑ سے ہوئی۔ یہی وہ ملزم ہے جو سی سی ٹی وی میں کلش کو جھولے میں چھپا کر لے جاتا ہوا نظر آیا تھا۔
ایک نہیں، تین کلش چرائے گئے تھے
پولیس کے مطابق گرفتار ملزم کا نام بھوشن ورما ہے۔ تفتیش کے دوران اس نے دعویٰ کیا ہے کہ ایک نہیں بلکہ تین کلش چرائے گئے تھے۔ پولیس نے ایک کلش برآمد کر لیا ہے جبکہ باقی دو ملزمان کی گرفتاری کے لیے چھاپے مارے جا رہے ہیں۔
ملزم پر پہلے بھی کئی مقدمات درج
پولیس ذرائع کے مطابق، ملزم جین بھوشن ورما کا تعلق جین سماج سے نہیں ہے۔ لیکن سی سی ٹی وی فوٹیج میں صاف دکھ رہا ہے کہ اس نے دھوتی اور چننی پہن رکھی تھی، جو جین برادری کے لوگ اپنے مذہبی انوشٹھان یا پوجا کے دوران پہنتے ہیں۔ پولیس کے مطابق یہ واردات نہایت منصوبہ بندی کے ساتھ انجام دی گئی۔ اس کے خلاف پہلے سے بھی کئی کیس درج ہیں۔
قیمتی کلش کی تفصیل
دہلی کے لال قلعہ احاطے میں جاری جین دھرم کے مذہبی انوشٹھان میں یہ قیمتی کلش "وشو شانتی" کے لیے قائم کیا گیا تھا، لیکن اسی دوران اسے چرا لیا گیا۔ چرایا گیا کلش مکمل طور پر سونے کا بنا ہوا ہے، جس کا وزن تقریباً 760 گرام ہے۔ اس کے اوپر 150 گرام ہیروں، مانک اور پنا سے جڑا ہوا تھا۔
افراتفری کے دوران غائب کیا گیا
لال قلعے کے احاطے میں جین سماج کا یہ انوشٹھان 15 اگست پارک میں جاری ہے اور 9 ستمبر تک چلے گا۔ صنعتکار سدھیر جین یہ کلش روزانہ پوجا کے لیے لاتے تھے۔ پچھلے منگل کو اس پروگرام میں لوک سبھا اسپیکر اوم برلا بھی شریک ہوئے تھے۔ ان کے استقبال کے دوران پیدا ہونے والی افراتفری میں کلش غائب ہو گیا۔
کئی دنوں سے گھوم رہا تھا
پولیس نے بتایا کہ ملزم کئی دنوں سے دھوتی کُرتا پہن کر انوشٹھان کے مقام کے آس پاس گھوم رہا تھا اور لوگوں میں گھل مل گیا تھا، اس لیے کسی کو اس پر شک نہیں ہوا۔ اوم برلا کے پروگرام سے نکلتے ہی اس نے کلش پر ہاتھ صاف کر دیا اور اسے جھولے میں ڈال کر فرار ہوگیا۔ پولیس نے مقام پر لگے سی سی ٹی وی کیمروں کی مدد سے اس کی شناخت کر لی تھی۔
