آئیزول/ آواز دی وائس

وزیر اعظم نریندر مودی نے ہفتہ کے روز کہا کہ شمال مشرقی خطے کو پہلے "ووٹ بینک" کی سیاست کے باعث بھاری نقصان اٹھانا پڑا، لیکن گزشتہ 11 برسوں میں مرکز کی بھارتیہ جنتا پارٹی (بی جے پی) کی قیادت والی حکومت کی کوششوں سے یہ خطہ اب ملک کی ترقی کا انجن بن چکا ہے۔

مودی نے میزورم میں 9,000 کروڑ روپے کے منصوبوں کا افتتاح کرتے ہوئے آئیژول کے قریب لینگپوی ہوائی اڈے سے ایک عوامی ریلی کو ڈیجیٹل ذریعے سے خطاب کیا، کیونکہ شدید بارش کے باعث وہ شہر کے وسط میں واقع پروگرام کے مقام لاموآل میدان تک نہیں پہنچ سکے۔

انہوں نے کہا کہ میزورم مرکز کی "ایکٹ ایسٹ" پالیسی میں ایک اہم کردار ادا کرتا ہے اور کلادان ملٹی ماڈل ٹرانزٹ پروجیکٹ اور ریل لائن ریاست کو جنوب مشرقی ایشیا سے جوڑیں گی۔ وزیر اعظم نے بیرابی۔سیرانگ لائن کا آغاز کرتے ہوئے کہا کہ اس سے میزورم ملک کے ریل نقشے پر شامل ہو گیا ہے۔ مودی نے کہا کہ یہ ریاست کے لیے ایک تاریخی دن ہے کیونکہ یہ ریل لائن ریاستی دارالحکومت آئیژول کو بڑے شہروں سے جوڑے گی۔

انہوں نے کہا کہ مختلف چیلنجز اور دشوار گزار علاقوں کو عبور کرتے ہوئے مکمل کی گئی یہ منصوبہ ریاست کے عوام کی زندگیوں میں بڑا بدلاؤ لائے گا۔ انہوں نے کہا کہ کنیکٹیویٹی بڑھنے سے پورے شمال مشرق میں تعلیمی، ثقافتی اور معاشی رشتے مضبوط ہوں گے، روزگار کے مواقع پیدا ہوں گے اور سیاحت کو فروغ ملے گا... جو پہلے نظرانداز تھے، وہ اب سب سے آگے ہیں، جو پہلے حاشیے پر تھے، وہ اب مرکزی دھارے میں ہیں۔

مودی نے کہا کہ چاہے آزادی کی جدوجہد ہو یا قوم کی تعمیر، میزورم کے عوام نے ملک کے لیے بڑا کردار ادا کیا ہے۔ انہوں نے کہا کہ قومی کھیل پالیسی میزورم کے کھلاڑیوں کے لیے نئے مواقع کے دروازے کھولے گی، جس نے کئی کھلاڑی پیدا کیے ہیں۔

وزیر اعظم نے کہا کہ شمال مشرق اب کاروباری صلاحیتوں کا ایک اہم مرکز بنتا جا رہا ہے، جہاں 4,500 اسٹارٹ اپس اور 25 "انکیوبیٹرز" کام کر رہے ہیں۔ نئی جی ایس ٹی شرحوں کے بارے میں انہوں نے کہا کہ ان اصلاحات سے کئی مصنوعات پر ٹیکس کم ہو گئے ہیں، جس سے عوام کی زندگی آسان ہوگی۔مودی نے کہا کہ ان اصلاحات کے نتیجے میں کینسر جیسی بیماریوں کے علاج میں استعمال ہونے والی ادویات سستی ہوں گی اور گاڑیوں کی قیمتوں میں بھی کمی دیکھی جا رہی ہے۔

انہوں نے کہا کہ کانگریس کے دورِ اقتدار میں دواؤں اور انشورنس پالیسی پر بھاری ٹیکس لگایا جاتا تھا اور صحت کی خدمات مہنگی تھیں، لیکن آج یہ سستی ہو گئی ہیں۔ مودی نے کہا کہ مالی سال 2025-26 کی پہلی سہ ماہی میں ہندوستان کی معیشت 7.8 فیصد کی شرح سے بڑھی، جو بڑی عالمی معیشتوں میں سب سے تیز ہے۔آپریشن سیندور کے بارے میں انہوں نے کہا کہ ملک کے فوجیوں نے "دہشت گردی کو فروغ دینے والوں کو سبق سکھایا" اور اس میں "میڈ اِن انڈیا" پہل کے تحت بنے ہتھیاروں نے اہم کردار ادا کیا۔