نئی دہلی/آواز دی وائس

دہلی کی ایک عدالت نے سابق "را" افسر وکاس یادو کے خلاف غیر ضمانتی وارنٹ جاری کیا ہے۔ وکاس کو امریکہ نے خالصتانی علیحدگی پسند گُرپت وانت سنگھ پنوں کے قتل کی مبینہ سازش میں سازش کار قرار دیا تھا۔ عدالت نے کہا کہ یادو مبینہ اغوا اور جبری وصولی کے ایک معاملے میں بار بار طلب کیے جانے کے باوجود پیش نہیں ہوئے۔

پٹیالہ ہاؤس کورٹ کے ایڈیشنل سیشن جج سوربھ پرتاپ سنگھ لالر نے پیر کو جاری ایک حکم میں کہا کہ یادو صبح سے ہی غیر حاضر تھے۔ انہوں نے کہا کہ ملزم وکاس یادو کے خلاف غیر ضمانتی وارنٹ جاری کیا جاتا ہے اور اس کے ضامن کو ہندوستانی شہری تحفظ ضابطہ کی دفعہ 491 (ضمانت ضبط ہونے کا طریقۂ کار) کے تحت 17 اکتوبر تک کے لیے نوٹس دیا جاتا ہے۔ ذرائع کے مطابق، یادو کے خاندان کا ایک رکن اس معاملے میں ضامن تھا۔

اتفاق سے، پیر کو دہلی میں تمام ضلعی عدالتوں کی بار ایسوسی ایشنز کی کوآرڈی نیشن کمیٹی کی جانب سے دی گئی ہڑتال کا تیسرا دن تھا۔ یہ ہڑتال ایل جی وی کے سکسینہ کے جاری کردہ ایک نوٹیفکیشن کے خلاف تھی، جس کے تحت پولیس کو تھانوں سے عدالتوں میں ورچوئل طریقے سے شواہد پیش کرنے کی اجازت دی گئی تھی۔

یادو کو 18 دسمبر 2023 کو دہلی پولیس کی اسپیشل سیل نے گرفتار کیا تھا، جب روہنی کے ایک رہائشی کی شکایت پر ان کے خلاف ایف آئی آر درج کی گئی تھی۔ اس میں ان پر جبری وصولی اور اغوا کے الزامات لگائے گئے تھے اور انہیں گینگسٹر لارنس بشنوئی سے جوڑا گیا تھا۔

امریکی حکام کی جانب سے پنوں معاملے میں یادو کا نام سامنے آنے کے تین ہفتے بعد یہ گرفتاری عمل میں آئی تھی۔ روہنی معاملے میں یادو اور ان کے ایک مبینہ ساتھی کو بعد میں ضمانت پر رہا کر دیا گیا تھا جبکہ پولیس نے چالان بھی داخل کر دیا تھا۔

اسی دوران، یادو نے دہلی کی ایک عدالت میں اپنی جان کو خطرہ بتاتے ہوئے پیشی سے چھوٹ کی درخواست دائر کی تھی، جسے قبول کر لیا گیا تھا۔ لیکن انہوں نے پیر کو کوئی نئی درخواست دائر نہیں کی، جس کے بعد عدالت کو یہ قدم اٹھانا پڑا۔ رابطہ کرنے پر یادو کے وکیل آر کے ہانڈو نے سماعت کی تصدیق کی لیکن کہا کہ انہیں غیر ضمانتی وارنٹ  کے بارے میں کوئی اطلاع نہیں ہے۔

تحقیق کاروں نے یادو کو دبئی میں "مہا دیو آن لائن بُک" سٹہ بازی ریکٹ کے ایک مبینہ رکن سے بھی جوڑا ہے۔ اس دوران یادو کے مبینہ ساتھی عبداللہ خان نے عدالت میں اپنے پاسپورٹ کی رہائی کی مدت بڑھانے کے لیے درخواست دائر کی، جس میں دعویٰ کیا گیا کہ ان کے والد کو خون کا کینسر ہے، جس کے علاج کے لیے انہیں دبئی، سنگاپور اور برطانیہ میں اضافی طبی مشورہ لینا ہوگا۔ عدالت نے کہا کہ دیے گئے دلائل کے پیش نظر پاسپورٹ کی رہائی کی مدت اگلی سماعت یعنی 17 اکتوبر تک بڑھائی جاتی ہے۔