نوئیڈا: نوئیڈا پولیس نے گؤکشی کے الزام میں مطلوب پانچ ملزمان کو ہفتہ کی علی الصبح ایک مبینہ پولیس مقابلے کے بعد گرفتار کر لیا۔ پولیس کے مطابق ملزمان کے قبضے سے گؤکشی میں استعمال ہونے والے ہتھیار، آلات اور دیگر سامان برآمد کیا گیا ہے۔

ایڈیشنل ڈپٹی کمشنر آف پولیس (زون سوم) سدھیر کمار سنگھ نے بتایا کہ تھانہ ربوپورہ کی پولیس ٹیم صبح سویرے رونیزا کٹ پر چیکنگ کر رہی تھی کہ اسی دوران ایک مشتبہ آٹو رکشہ آتا ہوا دکھائی دیا۔ پولیس نے رکشہ کو رکنے کا اشارہ کیا تاہم ملزمان فرار ہونے کی کوشش کرنے لگے۔

انہوں نے بتایا کہ پولیس نے تعاقب کے بعد آٹو رکشہ کو گھیر لیا۔ خود کو گھرا ہوا دیکھ کر ملزمان نے پولیس پر فائرنگ شروع کر دی۔ جوابی کارروائی میں پولیس نے بھی فائرنگ کی، جس کے نتیجے میں دہلی کے اوکھلا کے رہائشی سید امین (35) اور ہریانہ کے ضلع نوح کے رہائشی گورامیا (32) ٹانگ میں گولی لگنے سے زخمی ہو گئے۔ پولیس کے مطابق زخمی ملزمان کے قبضے سے دو دیسی ساختہ پستول اور کارتوس برآمد کیے گئے ہیں۔

دونوں کو طبی امداد کے لیے اسپتال میں داخل کرا دیا گیا ہے۔ افسر نے مزید بتایا کہ زخمی ملزمان سے حاصل معلومات کی بنیاد پر پولیس نے دیگر ساتھیوں کی تلاش شروع کی اور مزید تین افراد کو گرفتار کر لیا۔ گرفتار ملزمان کے قبضے سے گؤکشی میں استعمال ہونے والا آٹو رکشہ، چاقو، سرنج، انجکشن، آری، لوہے کی نوکیلی سلاخ، دو موہرے، رسی کا ٹکڑا اور چار خالی پلاسٹک کے تھیلے برآمد کیے گئے۔

گرفتار دیگر ملزمان کی شناخت ہریانہ کے ضلع نوح کے رہائشی منسر (24) اور محمد بلال (23) جبکہ دہلی کے کالندی کنج کے رہائشی پشپیندر کمار (24) کے طور پر ہوئی ہے۔ پولیس حکام کے مطابق ان ملزمان کے خلاف قومی دارالحکومت خطے (این سی آر) کے مختلف تھانوں میں گؤکشی کے متعدد مقدمات درج ہیں۔ حکام نے بتایا کہ 26 فروری کو تھانہ ربوپورہ کے علاقے میں مردہ مویشی برآمد ہوا تھا، جس کی تفتیش میں یہی ملزمان ملوث پائے گئے۔