نئی دہلی: آل انڈیا مجلس اتحاد المسلمین کے سربراہ اسدالدین اویسی نے امریکی صدر ڈونالڈ ٹرمپ کو نوبیل امن انعام کے لیے نامزد کیے جانے پر سخت ردِ عمل ظاہر کیا ہے۔ اس پیش رفت کے بعد اویسی نے اسرائیلی وزیر اعظم بنیامین نیتن یاہو کو بین الاقوامی عدالت کا بھگوڑا قرار دیا، اور پاکستانی فوج کے سربراہ جنرل عاصم منیر کو ہندوستان میں دہشت گردی کا سب سے بڑا برآمد کنندہ کہا۔
اسرائیلی وزیر اعظم نیتن یاہو نے حالیہ دنوں میں وائٹ ہاؤس میں ڈونالڈ ٹرمپ سے ملاقات کی، اور اس دوران انہیں نوبیل امن انعام کے لیے نامزد کرنے کا اعلان کیا۔ ٹرمپ اس اعلان سے حیران ہو گئے اور مسکراتے ہوئے کہا: "مجھے تو معلوم ہی نہیں تھا۔
اسدالدین اویسی نے سوشل میڈیا پلیٹ فارم "ایکس" پر ایک پوسٹ میں لکھا: پاکستانی فوج کے سربراہ عاصم منیر اور اسرائیلی وزیر اعظم نیتن یاہو دونوں چاہتے ہیں کہ ڈونالڈ ٹرمپ کو نوبیل امن انعام دیا جائے۔ منیر ہندوستان میں دہشت گردی کا ایک اہم برآمد کنندہ ہے اور نیتن یاہو بین الاقوامی فوجداری عدالت کا ایک بھگوڑا ہے، جس نے فلسطینیوں کا کھلے عام قتل عام کیا ہے۔
ان دونوں کو امریکہ کی مکمل حمایت حاصل ہے۔یہ پہلا موقع نہیں ہے کہ ڈونالڈ ٹرمپ کا نام نوبیل انعام کے ساتھ جُڑا ہو۔ انہوں نے پہلے بھی دعویٰ کیا تھا کہ انہوں نے "آپریشن سندور" کے بعد ہندوستان اور پاکستان کے درمیان ممکنہ جنگ کو روکنے میں کردار ادا کیا، اور اسی بنیاد پر انہیں نوبیل انعام ملنا چاہیے۔
Pakistani Army Chief Asim Munir and Israeli PM Netanyahu
— Asaduddin Owaisi (@asadowaisi) July 8, 2025
both believe that Doland Trump should be given the Nobel Peace Prize. Munir is a key exporter of terrorism to India and Netanyahu is a fugitive of the International Criminal Court who has openly committed genocide of… pic.twitter.com/1Yl1rP8lAY
ٹرمپ کئی بار یہ بھی کہہ چکے ہیں کہ: میں نے کئی جنگیں رکوا دی ہیں، لیکن مجھے نوبیل انعام نہیں دیا گیا، اور شاید دیا بھی نہ جائے۔ اس سارے معاملے پر اویسی کا سخت موقف نہ صرف اسرائیل اور پاکستان کی پالیسیوں پر تنقید ہے بلکہ یہ امریکہ کی عالمی سیاسی حکمت عملی پر بھی سوالیہ نشان ہے۔
ان کا کہنا ہے کہ وہ شخص جس پر جنگی جرائم اور نسل کشی جیسے الزامات ہیں، اور جسے بین الاقوامی عدالت نے طلب کر رکھا ہے، وہ کس طرح کسی کو امن کا نوبیل انعام دینے کی سفارش کر سکتا ہے؟ اسی طرح وہ جنرل عاصم منیر کی حمایت کو ہندوستانی سلامتی کے لیے خطرہ مانتے ہیں۔ یہ بیان عالمی سیاست میں طاقت، مفادات اور دوہری پالیسیوں کی پیچیدگیوں کو بھی اجاگر کرتا ہے، جہاں اصل انصاف اور اخلاقیات کو اکثر نظر انداز کر دیا جاتا ہے۔
