نئی دہلی:  مڈل ایسٹ کے بڑھتے ہوئے بحران کے پیش نظر نریندر مودی نے اتوار کے روز سکیورٹی معاملات کی کابینہ کمیٹی کی ایک اہم اور طویل میٹنگ کی صدارت کی۔ اس میٹنگ میں ملک کی معیشت اور عام آدمی کی روزمرہ ضروریات کو محفوظ رکھنے کے لیے کئی بڑے فیصلے کیے گئے۔ حکومت نے واضح کیا کہ عالمی حالات چاہے جیسے بھی ہوں بھارت کی سپلائی چین کو متاثر نہیں ہونے دیا جائے گا۔ اس موقع پر کابینہ سیکریٹری نے عالمی صورتحال اور اب تک اٹھائے گئے اقدامات پر تفصیلی پریزنٹیشن بھی دی۔ وزیر اعظم نے ہدایت دی کہ حکومت کے تمام شعبے ایک متحد نظام کے طور پر کام کریں تاکہ عوام پر اس بحران کا کم سے کم اثر پڑے۔

میٹنگ میں خوراک، توانائی اور ایندھن کی سپلائی کو یقینی بنانے کے لیے قلیل مدتی اور طویل مدتی منصوبہ بندی کی گئی۔ کسانوں کے لیے کھاد کی دستیابی کا جائزہ لیا گیا اور یقین دہانی کرائی گئی کہ آئندہ خریف سیزن میں کسی قسم کی کمی نہیں ہوگی جبکہ بیرونی ممالک سے متبادل ذرائع تلاش کرنے کا عمل بھی شروع کیا جائے گا۔ بجلی کی بلا تعطل فراہمی کے لیے پاور پلانٹس میں کوئلے کے وافر ذخائر کی تصدیق کی گئی تاکہ گھریلو اور صنعتی شعبوں کو کسی قسم کی پریشانی کا سامنا نہ ہو۔

مزید برآں کیمیکل فارما اور پیٹروکیمیکل شعبوں کے لیے خام مال کی درآمد کے نئے راستے تلاش کرنے اور بھارتی مصنوعات کے لیے عالمی سطح پر نئی منڈیاں بنانے پر بھی غور کیا گیا۔ وزیر اعظم نے خاص طور پر ہدایت دی کہ جنگ کی آڑ میں ضروری اشیاء کی ذخیرہ اندوزی اور کالابازاری کو روکنے کے لیے سخت نگرانی کی جائے اور ریاستی حکومتوں کے ساتھ قریبی تال میل برقرار رکھا جائے۔

انہوں نے اس بات پر زور دیا کہ یہ عالمی تنازع مسلسل بدلتی ہوئی صورتحال ہے جس کے اثرات پوری دنیا پر پڑ رہے ہیں اس لیے ضروری ہے کہ شہریوں کو ہر ممکن حد تک اس کے اثرات سے محفوظ رکھا جائے۔ اس مقصد کے لیے ایک خصوصی گروپ تشکیل دینے کی ہدایت بھی دی گئی ہے جو تمام وزارتوں کے ساتھ مل کر حالات پر گہری نظر رکھے گا اور کسی بھی ہنگامی صورتحال میں فوری اقدامات کو یقینی بنائے گا۔