نئی دہلی: سپریم کورٹ نے مسلم لڑکے اور ہندو لڑکی کے ساتھ رہنے پر اعتراض کرنے کے لیے اتراکھنڈ حکومت کو جھاڑ پلا دی ہے۔ کورٹ نے چھ ماہ سے جیل کی سزاپاٹنے والے مسلم شخص کو ضمانت دیتے ہوئے کہا کہ ریاستی حکومت کو ان کے ساتھ رہنے پر اعتراض کرنے کا کوئی حق نہیں ہے کیونکہ دونوں بالغ ہیں، وہ اپنے فیصلے خود لے سکتے ہیں، اور اپنے گھر والوں کی رضا مندی سے ان کی شادی ہوئی ہے۔

جسٹس بی۔ وی۔ ناگراتنا اور جسٹس ستیش چندر شرما کی بنچ نے درخواست گزار امان سدھی کی ضمانت کی درخواست پر سماعت کی۔ امان کو اتراکھنڈ فریڈم آف ریلیجن ایکٹ، 2018 اور تعزیراتِ ہند ، 2023 کے تحت اپنی مذہبی شناخت چھپانے اور ہندو رسم و رواج کے مطابق ہندو لڑکی سے دھوکے سے شادی کرنے کے الزام میں گرفتار کیا گیا تھا۔ امان نے فروری میں اتراکھنڈ ہائی کورٹ میں درخواست دائر کی تھی، لیکن انہیں ضمانت نہیں ملی تھی۔

سپریم کورٹ نے حکم میں کہا، ریاستی حکومت کو درخواست گزار اور اس کی بیوی کے ساتھ رہنے پر اعتراض نہیں ہونا چاہیے کیونکہ ایک تو دونوں بالغ ہیں، اپنے فیصلے لے سکتے ہیں۔ دوسرا، ان کی شادی میں ان کے والدین اور خاندان کی اجازت بھی شامل ہے۔" کورٹ نے یہ بھی صاف کیا کہ جاری ہونے والی فوجداری کارروائی ان کے ساتھ رہنے کی راہ میں رکاوٹ نہیں بنے گی۔

سدھی کے وکیل نے سپریم کورٹ کو بتایا کہ ان کے موکل کی شادی ارینج میرج تھی، لیکن تھوڑی دیر بعد کچھ لوگ اور تنظیمیں ان کی شادی پر اعتراض کرنے لگیں اور پولیس تھانے میں شکایت درج کروا دی۔ وکیل نے یہ بھی کہا کہ اگر ان کے موکل کو ضمانت مل جاتی ہے تو یہ جوڑا اپنے خاندانوں سے الگ رہ کر سکون سے زندگی گزارے گا۔

اس کے بعد بنچ نے فوراً درخواست گزار کو ضمانت دینے کا حکم دے دیا۔ وکیل نے کہا کہ سدھی کی شادی دونوں خاندانوں کی رضا مندی سے ہوئی تھی اور درخواست گزار نے شادی کے اگلے ہی دن ایک حلف نامہ بھی جمع کرایا تھا کہ اس نے اپنی بیوی پر مذہب تبدیل کرنے کے لیے کوئی دباؤ نہیں ڈالا ہے۔ دونوں اپنے اپنے مذہب کی پیروی کرنے کے لیے آزاد ہیں۔