پٹنہ: جنتا دل یونائیٹڈ کے قومی صدر نتیش کمار اب بہار کے وزیراعلیٰ کے عہدے سے مستعفی ہو رہے ہیں اور وہ راجیہ سبھا جا رہے ہیں۔ انہوں نے خود اس کا اعلان کیا ہے۔ دو دہائیوں سے جس بہار میں وہ سیاست کر رہے تھے، اسے انہوں نے الوداع کہہ دیا۔ اب وہ دہلی جا رہے ہیں۔

وزیراعلیٰ نتیش کمار نے سوشل میڈیا پر جو بیان دیا، اس نے تمام قیاس آرائیوں کا خاتمہ کر دیا۔ انہوں نے لکھا کہ پچھلے دو دہائیوں سے زیادہ عرصے سے آپ نے مجھے مسلسل اپنا اعتماد اور حمایت دی، اور اسی کی بنیاد پر ہم نے بہار اور آپ سب کی خدمت پوری دیانتداری کے ساتھ کی۔ آپ کے اعتماد اور حمایت کی ہی وجہ ہے کہ آج بہار ترقی اور وقار کا نیا معیار پیش کر رہا ہے۔ اس کے لیے میں نے پہلے بھی کئی بار آپ کا شکریہ ادا کیا ہے۔

وزیراعلیٰ نے لکھا کہ پارلیمانی زندگی شروع کرنے کے وقت سے ہی میرے دل میں خواہش تھی کہ میں بہار کی اسمبلی کے دونوں ایوانوں کے ساتھ ساتھ پارلیمنٹ کے دونوں ایوانوں کا بھی رکن بنوں۔ اسی سلسلے میں اس بار ہونے والے انتخابات میں میں راجیہ سبھا کا رکن بننا چاہ رہا ہوں۔ میں آپ کو پوری دیانتداری سے یقین دلانا چاہتا ہوں کہ آپ کے ساتھ میرا یہ تعلق مستقبل میں بھی برقرار رہے گا اور آپ کے ساتھ مل کر ایک ترقی یافتہ بہار بنانے کا عہد قائم رہے گا۔ جو نئی حکومت بنے گی، اسے میرا مکمل تعاون اور رہنمائی حاصل رہے گی۔

पिछले दो दशक से भी अधिक समय से आपने अपना विश्वास एवं समर्थन मेरे साथ लगातार बनाए रखा है, तथा उसी के बल पर हमने बिहार की और आप सब लोगों की पूरी निष्ठा से सेवा की है। आपके विश्वास और समर्थन की ही ताकत थी कि बिहार आज विकास और सम्मान का नया आयाम प्रस्तुत कर रहा है। इसके लिए पूर्व में…

— Nitish Kumar (@NitishKumar) March 5, 2026

وزیراعلیٰ نیتیش کمار کے راجیہ سبھا جانے کے اعلان کے بعد جے ڈی یو کارکنان میں ناراضگی دیکھنے کو ملی ہے۔ کارکنان کا کہنا ہے کہ بہار اسمبلی کے ۲۰۲۵ کے انتخابات میں ہم نے وزیراعلیٰ نیتیش کمار کے چہرے پر ووٹ دیا ہے۔ عوام اور کارکنان کی بات نیتیش کمار کو سننی ہوگی۔ عوام پٹنہ پہنچ رہی ہے۔ ہم کسی بھی قیمت پر انہیں دہلی نہیں جانے دیں گے۔ عوام نے انہیں وزیراعلیٰ بنایا ہے۔ یہ ناانصافی ہے۔

بہار نیتیش کمار کا خاندان ہے۔ وہ بہار کی عوام کو چھوڑ کر کیسے جا سکتے ہیں؟ جے ڈی یو کارکنان نے وزیراعلیٰ ہاؤس کے سامنے بھرپور نعرے بازی کی۔ وزیراعلیٰ نتیش کمار سے بات چیت کے بعد مرکزی وزیر للن سنگھ نے نشانت کمار سے ملاقات کی۔ للن سنگھ نشانت کے ساتھ مستقبل کی منصوبہ بندی پر بات کر رہے ہیں۔ نشانت کا کردار کیا ہوگا؟ انہیں کون سی چیلنجز کا سامنا کرنا پڑے گا؟ یہ سب باتیں لالن سنگھ کے زیر بحث ہیں۔ ذرائع کے مطابق نشانت کمار کو نائب وزیراعلیٰ بنایا جا سکتا ہے۔