پٹنہ: بہار کے وزیراعلیٰ نتیش کمار نے خواتین کے بااختیار ہونے کے حوالے سے بڑا اعلان کیا ہے۔ انہوں نے کہا کہ ان کی حکومت نے 2005 میں اقتدار سنبھالنے کے بعد سے ہی خواتین کو خود کفیل بنانے کے لیے کئی اقدامات کیے ہیں اور اب اسی سمت میں ایک تاریخی فیصلہ لیا گیا ہے۔

بہار کے وزیراعلیٰ نتیش کمار نے اپنے ایکس اکاؤنٹ (سابقہ ٹویٹر) پر خواتین کے بااختیار ہونے کے تعلق سے ایک اہم اعلان کیا۔ انہوں نے لکھا کہ نومبر 2005 میں حکومت بننے کے بعد سے خواتین کو بااختیار اور خود کفیل بنانے کے لیے مسلسل کوششیں کی جا رہی ہیں۔ آج خواتین اپنی محنت سے نہ صرف ریاست کی ترقی میں حصہ لے رہی ہیں بلکہ اپنے خاندان کی معاشی حالت کو بھی بہتر بنا رہی ہیں۔

وزیراعلیٰ نے بتایا کہ اسی مشن کو آگے بڑھاتے ہوئے کابینہ کی میٹنگ میں ’وزیراعلیٰ خواتین روزگار یوجنا‘ کو منظوری دی گئی ہے۔ اس منصوبے کا مقصد ریاست کے ہر خاندان کی ایک خاتون کو ان کی پسند کا روزگار شروع کرنے کے لیے مالی مدد فراہم کرنا ہے۔ ہر خاندان کی ایک خاتون کو روزگار شروع کرنے کے لیے پہلی قسط کے طور پر 10 ہزار روپے دیے جائیں گے۔

درخواست کا عمل جلد شروع ہوگا، جسے دیہی ترقیات محکمہ چلائے گا، جبکہ شہری ترقی اور رہائش محکمہ بھی اس میں تعاون کرے گا۔ ستمبر 2025 سے براہِ راست خواتین کے بینک کھاتوں میں رقم منتقل کی جائے گی۔ روزگار شروع کرنے کے چھ ماہ بعد خواتین کو 2 لاکھ روپے تک کی اضافی امداد دی جا سکے گی۔ خواتین کی مصنوعات کی فروخت کے لیے گاؤں سے لے کر شہروں تک ہاٹ بازار تیار کیے جائیں گے۔

وزیراعلیٰ نتیش کمار نے کہا کہ اس منصوبے سے خواتین کی معاشی حالت مزید بہتر ہوگی۔ ساتھ ہی ریاست کے اندر ہی بہتر روزگار کے مواقع میسر آئیں گے، جس سے لوگوں کو مجبوری میں باہر جانے کی ضرورت نہیں پڑے گی۔