پٹنہ (بہار) : راجیہ سبھا کے رکن اور جنتا دل (یونائیٹڈ) کے سربراہ نتیش کمار نے جمعہ کے روز مردم شماری 2027 کے تحت خود اپنی معلومات درج کرانے کا فارم پُر کیا۔ اپنے ایکس (سابق ٹوئٹر) اکاؤنٹ پر پوسٹ کرتے ہوئے نتیش کمار نے کہا، بھارت کی مردم شماری 2027 کے تحت آج سے بہار میں خود اندراج کا عمل شروع ہوا ہے، جس میں میں نے بھی اپنی رجسٹریشن کرائی ہے۔

دوسری جانب بھوبنیشور اور اڈیشہ کے مختلف علاقوں میں گھر گھر جا کر ڈیجیٹل طرز پر مردم شماری کا عمل جاری ہے، جو خود اندراج کے مرحلے کے بعد شروع ہوا ہے۔ یہ مرحلہ یکم اپریل سے 15 اپریل تک جاری رہا، جس میں ہزاروں افراد نے حصہ لیا۔ بھوبنیشور کی میئر سولچنا داس نے بتایا کہ شہریوں نے 33 سوالات پر مشتمل فارم خود پُر کیا اور دو لاکھ سے زائد افراد نے اس خود اندراج کے عمل میں حصہ لیا۔

انہوں نے کہا کہ اب 3012 سے زائد شمار کنندگان گھر گھر جا کر معلومات کی تصدیق اور نئے ڈیٹا کے حصول کے لیے کام کر رہے ہیں۔ ان کے مطابق یہ عمل عوام کی اقتصادی اور سماجی حالت کو سمجھنے اور ترقیاتی منصوبہ بندی میں مدد دے گا۔ انہوں نے عوام سے اپیل کی کہ وہ مردم شماری کے دوران درست معلومات فراہم کریں کیونکہ یہ عمل عوامی فلاح و بہبود کے لیے ہے۔

یہ بھی بتایا گیا کہ مردم شماری 2027 بھارت کی آزادی کے بعد 16ویں اور مجموعی طور پر 8ویں مردم شماری ہوگی، جس میں پہلی بار شہریوں کو ڈیجیٹل پلیٹ فارم کے ذریعے خود اندراج کی سہولت دی جا رہی ہے۔ مردم شماری دو مراحل میں مکمل ہوگی۔

پہلے مرحلے میں گھروں کی فہرست سازی اور رہائشی معلومات جمع کی جائیں گی، جبکہ دوسرے مرحلے میں آبادی کی تفصیلی گنتی ہوگی جس میں سماجی، معاشی، تعلیمی، ہجرت اور دیگر معلومات شامل ہوں گی۔ حکومتی فیصلے کے مطابق دوسری مرحلے میں ذات پات کی مردم شماری بھی کی جائے گی۔