نئی دہلی: نیتن نوین کو منگل کے روز باضابطہ طور پر بھارتیہ جنتا پارٹی (بی جے پی) کا قومی صدر اعلان کر دیا گیا۔ انہوں نے جے پی نڈا کی جگہ لی ہے۔ ان کے صدر بننے کے ساتھ ہی پارٹی کے لیے ایک نئے باب کا آغاز ہو گیا ہے، ایسے وقت میں جب بی جے پی ملک کی سیاست پر اپنی گرفت مزید مضبوط کرنے کی کوشش کر رہی ہے۔

بی جے پی کے تنظیمی انتخابات کے انتخابی افسر کے۔ لکشمن نے تنظیمی انتخابات کے نتائج کا اعلان کیا اور 45 سالہ نوین کو انتخابی سرٹیفکیٹ سونپا، جو پارٹی کے اعلیٰ ترین عہدے پر فائز ہونے والے اب تک کے سب سے کم عمر شخص ہیں۔ اس موقع پر وزیر اعظم نریندر مودی، سینئر وزیر راج ناتھ سنگھ، امیت شاہ، نیتن گڈکری اور دیگر رہنما بی جے پی ہیڈکوارٹر میں موجود تھے۔

نوین بی جے پی کے 12ویں صدر بنے ہیں۔ پارٹی کی بنیاد 1980 میں رکھی گئی تھی اور اسی سال ان کی پیدائش بھی ہوئی تھی۔ پس منظر میں رہنے والے نوین نے 14 دسمبر کو بی جے پی کے قائم مقام صدر مقرر ہونے کے بعد بہار حکومت میں قانون و انصاف، شہری ترقی اور رہائش کے وزیر کے عہدے سے استعفیٰ دے دیا تھا۔

نتائج کا اعلان کرتے ہوئے لکشمن نے کہا، یہ انتخاب اس بات کی عکاسی کرتا ہے کہ بی جے پی میں قیادت خاندانی وراثت سے نہیں بلکہ سخت محنت اور لگن سے ابھرتی ہے۔ جے پی نڈا نے پروگرام سے خطاب کرتے ہوئے کہا،آج کا دن انتہائی تاریخی ہے، جب ہمارے نوجوان، متحرک اور باصلاحیت نیتن نوین دنیا کی سب سے بڑی سیاسی جماعت بی جے پی کے قومی صدر کے طور پر عہدہ سنبھال رہے ہیں۔ میں اپنی اور کروڑوں کارکنان کی جانب سے انہیں دل کی گہرائیوں سے مبارکباد پیش کرتا ہوں۔