نئی دہلی: مرکزی وزیر برائے سڑک ٹرانسپورٹ و شاہراہیں نتن گڈکری نے منگل کے روز کہا کہ ملک کو قریب مستقبل میں 100 فیصد ایتھنول آمیز ایندھن حاصل کرنے کا ہدف رکھنا چاہیے، کیونکہ مغربی ایشیا کے بحران کے باعث تیل کی سپلائی میں غیر یقینی صورتحال نے بھارت کے لیے توانائی کے شعبے میں خود کفالت کو ضروری بنا دیا ہے۔

انہوں نے کہا کہ یکم اپریل سے نافذ ہونے والے کارپوریٹ اوسط فیول ایفیشنسی-3 معیارات کا الیکٹرک اور “فلیکس فیول” گاڑیوں پر زیادہ اثر نہیں پڑے گا۔ فلیکس فیول گاڑیاں وہ ہیں جن میں پیٹرول یا ڈیزل انجن ہوتا ہے اور انہیں ایک سے زیادہ قسم کے ایندھن پر چلانے کے لیے ڈیزائن کیا جاتا ہے، عام طور پر پیٹرول کو ایتھنول یا میتھانول کے ساتھ ملا کر استعمال کیا جاتا ہے۔

گڈکری نے انڈین فیڈریشن آف گرین انرجی کے گرین ٹرانسپورٹ کانفرنس سے خطاب کرتے ہوئے کہا کہ اس وقت مغربی ایشیا میں جنگ کے باعث توانائی کا بحران موجود ہے، اس لیے بھارت کے لیے توانائی میں خود کفالت حاصل کرنا ناگزیر ہے۔ انہوں نے بتایا کہ 2023 میں وزیرِ اعظم نریندر مودی نے 20 فیصد ایتھنول ملا ہوا پیٹرول (ای-20) متعارف کرایا تھا اور موجودہ وقت میں گاڑیاں معمولی تبدیلی کے ساتھ اس ایندھن پر چل سکتی ہیں۔

برازیل جیسے ممالک میں پہلے ہی 100 فیصد ایتھنول ملا ایندھن استعمال ہو رہا ہے۔ گڈکری نے کہا کہ بھارت اپنی ضرورت کا تقریباً 87 فیصد تیل درآمد کرتا ہے اور ہر سال تقریباً 22 لاکھ کروڑ روپے کا فوسل فیول درآمد کیا جاتا ہے، جس سے آلودگی میں بھی اضافہ ہوتا ہے، اس لیے متبادل اور بایو فیولز کی پیداوار بڑھانا ضروری ہے۔

گرین ہائیڈروجن کو مستقبل کا ایندھن قرار دیتے ہوئے انہوں نے کہا کہ ہائیڈروجن پمپنگ اسٹیشنز کی لاگت کم کرنا ضروری ہے تاکہ یہ معاشی طور پر قابلِ عمل ہو سکے۔ انہوں نے یہ بھی کہا کہ ہائیڈروجن کی ترسیل میں چیلنجز ہیں اور اس کی قیمت کم کر کے تقریباً ایک ڈالر فی کلوگرام تک لانا ہوگا تاکہ بھارت توانائی برآمد کرنے والا ملک بن سکے۔ گڈکری نے کہا کہ پیٹرول اور ڈیزل گاڑیوں کے استعمال کی حوصلہ شکنی ضروری ہے، لیکن لوگوں کو انہیں خریدنے سے زبردستی نہیں روکا جا سکتا۔ انہوں نے آٹو موبائل کمپنیوں سے کہا کہ وہ لاگت کے بجائے معیار پر توجہ دیں تاکہ وہ عالمی مارکیٹ میں بہتر طور پر مقابلہ کر سکیں۔