نئی دہلی: وزیر خزانہ نرملا سیتارمن نے پیر کے روز لوک سبھا میں کہا کہ دیوالیہ پن اور نادہندگی ضابطہ (آئی بی سی) کے باعث ملک کے بینکاری نظام میں نمایاں بہتری آئی ہے اور کمرشل بینکوں کے غیر فعال اثاثوں (این پی اے) کی وصولی میں بھی مدد ملی ہے۔

انہوں نے ایوان میں ‘دیوالیہ پن اور نادہندگی ضابطہ (ترمیمی) بل، 2025’ پر بحث کا جواب دیتے ہوئے کہا کہ اس بل کے ذریعے آئی بی سی میں 12 ترامیم تجویز کی گئی ہیں۔ بل پر بحث میں 40 اراکین نے حصہ لیا۔ وزیر خزانہ نے کہا کہ پارلیمنٹ کی قائمہ کمیٹی نے اس بل میں کل 17 اہم سفارشات پیش کی تھیں، جنہیں حکومت نے قبول کر لیا ہے۔

ان کے مطابق، حکومت نے ایک اور سفارش شامل کی ہے کہ قرض دہندگان کی کمیٹی کو درخواست دہندگان کے انتخاب کی وجوہات کو ریکارڈ کرنا ہوگا، جس سے شفافیت آئے گی۔ سیتارمن نے کہا کہ دیوالیہ پن اور نادہندگی ضابطہ سے بھارتی بینکاری نظام کی حالت میں کافی بہتری آئی ہے۔

انہوں نے کہا کہ این پی اے کی وصولی میں اس ضابطے نے مؤثر کردار ادا کیا ہے۔ سیتارمن کے مطابق کمرشل بینکوں کے این پی اے کی کل وصولی میں دیوالیہ ضابطہ کا حصہ 54 فیصد سے زیادہ رہا ہے۔ سیتارمن کا کہنا ہے کہ آئی بی سی کا بنیادی مقصد کبھی یہ نہیں تھا کہ اسے قرض وصولی کے ایک آلے کے طور پر استعمال کیا جائے۔ انہوں نے کہا کہ آئی بی سی کے نظام کے باعث اب دیوالیہ معاملات کے حل میں کمپنیاں پہلے کے مقابلے میں کہیں بہتر کارکردگی دکھا رہی ہیں، جبکہ پہلے ایسا نہیں تھا۔