نئی دہلی/ آواز دی وائس
قومی تحقیقاتی ایجنسی (این آئی اے) نے ناگالینڈ سے ہتھیاروں اور گولہ بارود کی اسمگلنگ کر کے بہار لانے کے معاملے میں مطلوب ایک ملزم کو گرفتار کیا ہے۔ حکام نے جمعہ کو یہ اطلاع دی۔
حکام نے بتایا کہ منظور خان عرف بابو بھائی مرکزی ملزم وکاس کمار کا قریبی ساتھی ہے، جو ناگالینڈ سے بہار میں اے کے-47 رائفلوں سمیت ممنوعہ بور کے ہتھیاروں کی اسمگلنگ میں سرگرم تھا۔
وفاقی انسدادِ دہشت گردی ایجنسی نے یہاں جاری ایک بیان میں کہا کہ اس کی تحقیقات میں یہ بات سامنے آئی ہے کہ منظور نے اپنے ساتھی ملزمان کے ساتھ مل کر عوامی امن و امان کو نقصان پہنچانے کے ارادے سے ممنوعہ ہتھیاروں کی اسمگلنگ کی سازش رچی، جس سے قومی سلامتی کو خطرہ لاحق ہوا۔
این آئی اے نے اگست 2024 میں اس معاملے کی تفتیش اپنے ہاتھ میں لی تھی اور اس دوران سازش میں منظور کے کردار کا انکشاف کیا۔
بیان میں کہا گیا ہے کہ یہ مقدمہ بنیادی طور پر بہار کے مظفرپور ضلع کے فکولی تھانے میں درج کیا گیا تھا، جہاں مرگھٹیا پل کے قریب لینس اور کارتوس کے ساتھ ایک اے کے-47 رائفل برآمد ہوئی تھی۔ پولیس نے اس معاملے میں چار ملزمان کو گرفتار کیا تھا اور ان کے خلاف اسلحہ ایکٹ کے تحت چالان بھی پیش کیا تھا۔
وفاقی ایجنسی کی جانب سے جاری بیان کے مطابق، این آئی اے نے تفتیش اپنے ہاتھ میں لینے کے بعد وکاس کمار، ستیم کمار، دیومنی رائے اور احمد انصاری کے خلاف پہلا ضمنی چالان داخل کیا ہے۔ اس نے بتایا کہ معاملے کی تفتیش ابھی جاری ہے۔
_(1).webp "این آئی اے نے اسلحہ کی اسمگلنگ میں شخص کو گرفتار کیا")
