نئی دہلی: بھارت کے چیف جسٹس سوریا کانت نے کہا ہے کہ کیرالہ میں دو نئے عدالتی احاطوں کا قیام انصاف کی بڑھتی ہوئی ضروریات پوری کرنے اور عدالتوں کو عوام کے قریب لانے کی سمت ایک اہم سرمایہ کاری ہے۔ کیرالہ حکومت کی جانب سے 100 کروڑ روپے کی لاگت سے ایرنجالکُڈا اور چاوکّڑ میں تعمیر کیے گئے دونوں عدالتی احاطوں کا چیف جسٹس نے منگل کی شام ڈیجیٹل ذریعے سے افتتاح کیا۔

اپنے خطاب میں چیف جسٹس نے کہا کہ انہیں بتایا گیا ہے کہ ضلع میں تقریباً 30,000 دیوانی مقدمات اور ایک لاکھ سے زائد فوجداری مقدمات زیرِ التوا ہیں۔ ان اعداد و شمار سے ظاہر ہوتا ہے کہ جیسے جیسے معاشرہ ترقی کر رہا ہے اور پیچیدہ ہوتا جا رہا ہے، عدالتوں پر بھی دباؤ بڑھ رہا ہے۔ ایسے میں نئے عدالتی احاطے انصاف کی بڑھتی ضروریات سے نمٹنے کے لیے ایک اہم سرمایہ کاری ہیں۔

انہوں نے کہا کہ نئے احاطوں کے ذریعے عدالتوں کو صرف فاصلے کے اعتبار سے ہی نہیں بلکہ بنیادی سہولیات اور بہتر رسائی کے ذریعے بھی عوام کے قریب لایا جا رہا ہے، تاکہ انصاف حقیقی معنوں میں لوگوں کی پہنچ میں ہو۔ جسٹس سوریا کانت نے کہا کہ ان منصوبوں کی اہمیت صرف عدالتی نظام میں نئی عمارتوں کے اضافے تک محدود نہیں، بلکہ یہ کوشش ہے کہ انصاف کا نظام بڑے شہروں اور میٹروپولیٹن علاقوں کے بجائے چھوٹے قصبوں میں رہنے والے لوگوں کے بھی قریب ہو۔

چیف جسٹس نے فیملی کورٹس میں الگ الگ کمروں پر مشتمل کونسلنگ رومز کو بھی اہم قرار دیا۔ انہوں نے کہا کہ نجی اور باوقار ماحول میں مشاورت کی سہولت ان لوگوں کے تئیں حساسیت کی عکاسی کرتی ہے جو اپنی زندگی کے انتہائی مشکل مرحلے میں مدد کے لیے عدالت کا رخ کرتے ہیں۔ انہوں نے خواتین وکلا کے لیے الگ کمرے فراہم کرنے کے اقدام کا بھی خیر مقدم کیا۔ چیف جسٹس نے کہا کہ عدالتی نظام میں خواتین وکلا کی تعداد بڑھ رہی ہے اور وہ انصاف کے نظام کا ایک لازمی حصہ ہیں۔ انہوں نے کہا کہ جدید عدالتی اداروں میں صرف فیصلے سنانے کے لیے ہی نہیں بلکہ مکالمے، مصالحت اور وقار کے لیے بھی مناسب جگہ ہونی چاہیے۔