رانچی/ آواز دی وائس

جھارکھنڈ کے وزیر سُدیویہ کمار نے بدھ کے روز دو روزہ کانکلیو کا افتتاح کیا، جس کا مقصد قومی تعلیمی پالیسی کی دفعات کے مطابق اسکولی بچوں کو کثیر لسانی تعلیم فراہم کرنے میں درپیش چیلنجز پر غور و خوض کرنا ہے۔ ایک سرکاری عہدیدار نے یہ جانکاری دی۔ نیشنل ملٹی لِنگول ایجوکیشن کانکلیو سے خطاب کرتے ہوئے ریاست کے اعلیٰ اور تکنیکی تعلیم کے وزیر سُدیویہ کمار نے کہا کہ یہ پہل پرائمری تعلیم کو مضبوط بنانے میں اہم کردار ادا کرے گی۔

انہوں نے کہا کہ یہ کانکلیو پرائمری تعلیم کے لیے ایک مضبوط اور بامعنی اقدام ہے۔ جھارکھنڈ اس متنوع ملک کا ایک خوبصورت نگینہ ہے، جہاں ایک پرانا مقولہ بالکل درست ثابت ہوتا ہےہر میل پر پانی بدلتا ہے اور ہر دس میل پر زبان۔ انہوں نے بتایا کہ ریاست میں پانچ بڑی قبائلی زبانیں اور چار علاقائی زبانیں ہیں، اور یہ ممکن نہیں کہ ریاست کے 24 اضلاع کو ایک ہی زبان کے ذریعے جوڑا جا سکے۔

وزیر نے کہا کہ جب ہم ان لسانی پھولوں کو ایک مالا میں پرونے کی بات کرتے ہیں تو جھارکھنڈ کی نمائندگی کے لیے کم از کم نو پھول ہونے چاہئیں۔ سُدیویہ کمار نے کہا کہ جھارکھنڈ ایجوکیشن پروجیکٹ کونسل نے پروموشن آف اپروپری ایٹ لینگویج اینڈ اکیڈمک اسکلز فار ہولسٹک ایجوکیشن   ملٹی لسانی تعلیمی منصوبے کے تحت پانچ قبائلی زبانیں—کُروکھ، سنتھالی، مُنڈاری، ہو اور کھڑیا پرائمری تعلیم میں متعارف کرائی ہیں، تاہم اب تک یہ صرف آٹھ اضلاع تک محدود ہے۔ انہوں نے مزید کہا کہ ریاست کی چار علاقائی زبانیں—کھورتھا، ناگپوری، پنچ پرگانیا اور کُرمَلی کو بھی پالاش اقدام میں شامل کرنے کی ضرورت ہے، تاکہ ان کا تحفظ ہو سکے اور پرائمری سطح پر ان کی تدریس ممکن بنائی جا سکے۔

انہوں نے کہا کہ میں وزیر اعلیٰ ہیمنت سورین سے درخواست کروں گا کہ ان چار علاقائی زبانوں کو شامل کرنا یقینی بنایا جائے، کیونکہ اس کے بغیر ترقی یافتہ جھارکھنڈ کا وژن ادھورا رہتا ہے۔ اس سمت میں سنجیدہ کوششیں کی جانی چاہئیں۔

آخر میں انہوں نے کہا کہ اگر ہم بنیادی سطح پر تعلیم کو جامع، سادہ اور عملی نہیں بنا پاتے تو یہ محض سطحی طور پر ایسے افراد پیدا کرے گی جو تختۂ سیاہ سے خطاطی نقل کر لیتے ہیں، لیکن ایسے شہری تیار نہیں ہوں گے جن کے پاس اپنی سمجھ، علم اور فکری صلاحیت ہو۔