شیلاگ: مرکزی وزیر خزانہ نرملا سیتا رمن نے ہفتے کے روز خاص طور پر میگھالیہ جیسے علاقوں میں ترقی کی خواہشات اور ماحولیاتی تحفظ کے درمیان توازن قائم رکھنے کی ضرورت پر زور دیا۔ انہوں نے یہاں ایک مکالماتی اجلاس کے دوران اس بات کا اعتراف کیا کہ ماحولیاتی بحران اس حد تک بڑھ چکا ہے کہ اب بہترین موسمیاتی آلات بھی موسم کی درست پیش گوئی کرنے سے قاصر ہیں۔
وزیر خزانہ نے کہا، موسمیاتی حادثات عام بات ہو چکے ہیں۔ اچانک سیلاب آنا، اور وہ بارش جو پہلے کئی مہینوں میں ہوتی تھی، اب ایک ہی دن میں ہو رہی ہے، جس سے جان و مال کا بھاری نقصان ہو رہا ہے۔ انہوں نے دیہی اور جنگلاتی علاقوں میں تبدیلی کی طرف اشارہ کرتے ہوئے جدید انفراسٹرکچر کی ضرورت پر زور دیا۔
سیتا رمن نے کہا، "ہمیں آپٹیکل فائبر اور ڈیجیٹل آلات کے ذریعے رابطہ کاری اور عالمی رسائی کی ضرورت ہے تاکہ کاریگر اور کسان اپنے مصنوعات کی مارکیٹنگ کر سکیں۔ اس کا مطلب یہ ہے کہ ان علاقوں میں توسیع کی جائے جو صدیوں سے سرسبز و شاداب رہے ہیں۔ انہوں نے کہا کہ ماحولیاتی طور پر حساس علاقوں میں ترقی سے متعلق فیصلے مقامی سطح پر لیے جانے چاہئیں۔
ان کا کہنا تھا، یہ میرا کام نہیں ہے کہ میں کہیں اور سے یہ کہوں کہ کسی علاقے کو ترقی سے محروم رکھا جائے۔ وہاں رہنے والے لوگوں کو ہی یہ طے کرنا ہوگا کہ وہ کتنی ترقی کو قبول کرنے کے لیے تیار ہیں اور اس کی حد کیا ہونی چاہیے۔ مرکزی وزیر نے یہ اہم سوال بھی اٹھایا کہ اگر ترقی کو مکمل طور پر مسترد کر دیا جائے، تو کیا وہ لوگ جو نسلوں سے بغیر تبدیلی کے جی رہے ہیں اور اب بہتر زندگی کی خواہش رکھتے ہیں، مطمئن ہو سکیں گے؟
انہوں نے کہا کہ یہ بحث صرف ہندوستان میں ہی نہیں، بلکہ پوری دنیا میں موضوعِ بحث ہے۔ ماحولیاتی مسئلے کی ہنگامی نوعیت کو اجاگر کرتے ہوئے وزیر خزانہ نے کہا کہ اگلا عالمی ماحولیاتی سربراہی اجلاس برازیل میں ایمیزون کے جنگلات کے کنارے ایک دور دراز علاقے میں منعقد کیا جائے گا۔ اس کا مقصد یہ دکھانا ہے کہ دنیا اب موسمیاتی تبدیلی اور ترقی کے مباحثے کو براہ راست ان نازک ماحولیاتی نظاموں تک لا رہی ہے۔
سیتا رمن نے کہا، یہ ایک نہایت اہم بحث ہے۔ انہوں نے کہا، "مجھے خوشی ہے کہ یہ آج صبح یہاں سے شروع ہوئی۔ مرکزی وزیر خزانہ نے شہریوں، صنعت اور پالیسی سازوں کے درمیان تعاون کی اہمیت پر بھی زور دیا۔ انہوں نے کہا کہ مرکزی حکومت مالیاتی نظام تک رسائی بڑھانے اور ٹیکس نظام کو آسان بنانے کے لیے سرگرمی سے کام کر رہی ہے تاکہ شفافیت اور وسیع شرکت کو یقینی بنایا جا سکے۔
انہوں نے یقین دہانی کرائی، حکومت شراکتی پالیسی سازی کے لیے پرعزم ہے اور ہم تمام اسٹیک ہولڈرز کے لیے مالیاتی نظام کو زیادہ قابل رسائی اور مؤثر بنانے کی مسلسل کوشش کر رہے ہیں۔ مرکزی وزیر خزانہ نے میگھالیہ کی دو نمایاں خاتون ٹیکس دہندگان، ریمیفول شیلا اور وانجویلن کو اعزاز سے نوازا اور ملک کے ٹیکس نظام میں ان کی قابلِ قدر خدمات کو سراہا۔ وزیر خزانہ جمعرات سے میگھالیہ کے چار روزہ دورے پر ہیں۔
