ممبئی ۔ مہاراشٹر مدھیہ پردیش اور چھتیس گڑھ میں سرگرم کالعدم کمیونسٹ پارٹی آف انڈیا ماؤسٹ کی خصوصی ڈویژنل کمیٹی نے تینوں ریاستوں کے وزرائے اعلیٰ کو ایک اہم خط بھیجا ہے جس میں انہوں نے 15 فروری 2026 تک ہتھیار ڈالنے اور حکومت کے بحالی پروگرام کو قبول کرنے کا عندیہ دیا ہے۔ البتہ انہوں نے یہ شرط رکھی ہے کہ حکومت اور سکیورٹی فورسز ان کے خلاف جاری کارروائیاں فی الفور روک دیں تاکہ اعتماد اور امن کے ماحول میں یہ عمل مکمل ہو سکے۔

یہ خط 22 نومبر کو نکسل تنظیم کے ایم ایم سی زون کے ترجمان اننت کے نام سے جاری ہوا۔ اسے مہاراشٹر کے وزیر اعلیٰ دیویندر فڑنویس چھتیس گڑھ کے وزیر اعلیٰ وشنو دیو سائی وزیر داخلہ وجے شرما اور مدھیہ پردیش کے وزیر اعلیٰ موہن یادو کو بھی بھیجا گیا ہے۔

خط میں ایم ایم سی نے کہا ہے کہ وہ ہتھیار ڈالنے اور پنارمرگم اسکیم کا حصہ بننے کے لیے تیار ہیں مگر انہیں کچھ وقت درکار ہے تاکہ اندرونی مشاورت مکمل کی جا سکے۔ اسی لیے انہوں نے تینوں ریاستوں سے درخواست کی ہے کہ 15 فروری تک سکیورٹی آپریشنز کو روک دیا جائے۔ ان کے مطابق یہ مہلت زیادہ نہیں اور حکومت کی مقررہ ڈیڈ لائن یعنی 31 مارچ 2026 کے اندر ہی ہے۔

نکسلیوں نے یہ یقین دہانی بھی کرائی ہے کہ آنے والے پی ایل جی اے ہفتے کے دوران وہ کوئی سرگرمی نہیں کریں گے اور تمام کارروائیاں روک دی جائیں گی۔ پی ایل جی اے ہفتہ پیپلز لبریشن گوریلا آرمی کے قیام کی یاد میں منایا جاتا ہے۔

خط میں دو اہم ماؤنواز رہنماؤں کا حوالہ بھی دیا گیا ہے۔ ایک پلوری پرساد راؤ عرف شنکرنا جنہوں نے حال ہی میں حیدرآباد میں ہتھیار ڈالے اور دوسرے بھوپتی عرف سونو جنہوں نے گڈچرولی میں خود سپردگی اختیار کی۔ ایم ایم سی کے مطابق بدلتے ہوئے حالات نے انہیں اس نتیجے پر پہنچایا ہے کہ مسلح جدوجہد کو فی الحال روک دینا چاہیے۔

انہوں نے حکومت سے درخواست کی ہے کہ ان کا پیغام ریڈیو پر نشر کیا جائے تاکہ یہ تیزی سے تمام ساتھیوں تک پہنچ سکے۔ ساتھ ہی عوامی نمائندوں صحافیوں اور یوٹیوب جرنلسٹس سے بھی ثالثی کی اپیل کی گئی ہے تاکہ بات چیت کا راستہ آسان ہو سکے۔

اس خط پر ردعمل ظاہر کرتے ہوئے چھتیس گڑھ کے نائب وزیر اعلیٰ وجے شرما نے محتاط رویہ اختیار کیا ہے۔ ان کا کہنا ہے کہ نکسلیوں کی بتائی گئی تاریخ بہت دور ہے۔ ان کے مطابق اگر وہ واقعی ہتھیار ڈالنا چاہتے ہیں تو ٹھوس اور واضح تجویز پیش کریں کیونکہ ایسے معاملات میں 10 سے 15 دن بھی کافی ہوتے ہیں۔ انہوں نے یہ بھی کہا کہ اگر نکسل گروپس اپنے ساتھیوں کو کسی مخصوص مقام پر اکٹھا کرنا چاہتے ہیں تو حکومت اس علاقے کو خالی کرنے پر تیار ہے مگر شرط یہی ہے کہ ان کی جانب سے واضح منصوبہ سامنے آئے۔