ممبئی: بالی ووڈ کے معروف اداکار نواز الدین صدیقی نے کہا ہے کہ بھارتی فلم ساز حقیقت سے آنکھیں چرا کر جھوٹ پر مبنی فلمیں تیار کر رہے ہیں اور معاشرے کو مثبت سمت دینے میں ناکام ہیں۔ ایک حالیہ تقریب میں اداکار نے فلم انڈسٹری کے کردار اور نوجوانوں کے لیے اپنی نصیحتوں پر کھل کر بات کی۔

اداکار نے میزبان کے سوال پر کہ آیا فلم سازوں پر یہ ذمہ داری ہے کہ وہ اپنے کام کے ذریعے معاشرے کی رہنمائی کریں، کہا، "جی ہاں، بالکل، فلم سازوں کو معاشرے کو غلط سمت میں نہیں لے جانا چاہیے۔ سچائی بہت اہم ہے اور آج ہر کوئی جانتا ہے کہ حقیقت کیا ہے۔

" انہوں نے کہا کہ بالی ووڈ کی بہت سی فلمیں جھوٹ پر مبنی ہیں اور لوگ ان کے پیچھے چھپی حقیقت کو سمجھتے ہیں، چاہے کوئی اسے زبانی طور پر نہ کہے۔ "ہم جعلی کہانیاں بنا رہے ہیں اور ہر کوئی جانتا ہے کہ یہ حقیقت نہیں ہے۔" نواز الدین صدیقی نے عالمی حالات پر بھی اپنی نظر کا اظہار کیا اور کہا کہ ہر شخص دیکھ رہا ہے کہ سچ کیا ہے، جھوٹ کیا پھیلایا جا رہا ہے اور کون سا بیانیہ بنایا جا رہا ہے۔

اداکار نے پاکستانی مصنف سعادت حسن منٹو کے کردار کی تیاری کے بارے میں بتایا کہ انہوں نے منٹو کے کام کا مطالعہ کیا اور ان کی بے خوفی اور حقیقت پسندی نے انہیں مصنف کی شخصیت سمجھنے میں مدد دی۔ انہوں نے کہا کہ منٹو کی ویڈیوز دستیاب نہ ہونے کی وجہ سے کردار میں کافی اصلاح کی گئی۔

سیاست میں شمولیت کے حوالے سے پوچھے جانے پر نواز الدین نے کہا، "لوگوں کو اپنے کام پر توجہ مرکوز رکھنی چاہیے۔ میرے پاس سیکھنے کے لیے اتنی فنون ہیں کہ ایک زندگی صرف اسی میں گزار سکتا ہوں اور میری سیاست میں کوئی دلچسپی نہیں۔"

نوجوان اداکاروں کے لیے انہوں نے نصیحت کی کہ محنت، تربیت اور مسلسل مشق کے ذریعے وہ اپنی پہچان بنائیں۔ "انڈسٹری کے کئی سینئر لوگ اپنی کامیابی کو قسمت کا نتیجہ مانتے ہیں، مگر میں قسمت پر یقین نہیں رکھتا۔ آپ کو اتنی محنت کرنی چاہیے کہ نظر انداز کرنا ناممکن ہو جائے۔ اپنے خوابوں کا تعاقب کبھی نہ چھوڑیں، اگر آپ 10 بار ناکام ہوں، تو گیارہویں بار کامیاب ہو سکتے ہیں۔