گاندھی نگر:سلامتی کے میدان میں دوسرا مقام جیسی کوئی چیز نہیں ہوتی۔ یہاں صرف دو نتائج ہوتے ہیں۔ یا تو آپ جیتتے ہیں یا آپ ہار جاتے ہیں۔ اگر آپ جیت گئے تو تاریخ بناتے ہیں۔ لیکن اگر ہار گئے تو خود تاریخ بن جاتے ہیں۔ آپ کا وجود ختم ہو جاتا ہے۔ انہوں نے نوجوانوں کو خبردار کیا کہ سلامتی کا میدان سب سے زیادہ لگن اور نظم و ضبط کا تقاضا کرتا ہے۔ یہاں معمولی سی غلطی کی بھی کوئی جگہ نہیں ہوتی۔
ان خیالات کا اظہار قومی سلامتی مشیر اجیت ڈوبھال نے کیا ،جو گجرات کی سرزمین پر نیشنل ڈیفینس یونیورسٹی کے پانچویں کانووکیشن میں خطاب کررہے تھے ۔ اس موقع پر ہندستان کی صدر دروپدی مرمو موجود تھیں۔ اسی باوقار ماحول میں قومی سلامتی کے مشیر اجیت ڈوبھال کو اعزازی ڈاکٹریٹ کی ڈگری دی گئی۔ اس اعزاز کو قبول کرتے ہوئے انہوں نے ایسی باتیں کہیں جو صرف طلبہ کے لئے نہیں بلکہ پورے ملک کے لئے ایک اہم پیغام ہیں۔ انہوں نے سلامتی کے روایتی نظریات کو چیلنج کیا اور بتایا کہ کوئی ملک حقیقت میں کب مضبوط بنتا ہے۔
انہوں نے جنگ کے اصل نفسیات کو بھی واضح کیا۔ ان کے مطابق کسی بھی جنگ کا مقصد صرف زمین حاصل کرنا نہیں ہوتا۔ اصل مقصد دشمن کا حوصلہ توڑنا ہوتا ہے۔ جب مخالف کا حوصلہ ٹوٹ جاتا ہے تو وہ آپ کی شرائط پر سمجھوتہ کرنے پر مجبور ہو جاتا ہے۔
انہوں نے عالمی مثالوں کے ذریعے اپنی بات کو مضبوط کیا۔ انہوں نے سوال اٹھایا کہ سوویت یونین جیسا طاقتور ملک افغانستان سے کیوں واپس ہوا۔ امریکہ جیسا طاقتور ملک ویتنام اور بعد میں افغانستان میں اپنے مقاصد کیوں حاصل نہیں کر سکا۔انہوں نے بتایا کہ ان ناکامیوں کی وجہ ہتھیار یا ٹیکنالوجی کی کمی نہیں تھی۔ ان ممالک کے پاس جدید ترین وسائل موجود تھے۔ اس کے باوجود وہ کامیاب نہیں ہوئے کیونکہ سامنے والے لوگوں کی قوت ارادی بہت مضبوط تھی۔
انہوں نے کہا کہ کسی بھی ملک کی طاقت کا اندازہ لگاتے وقت سب سے بڑی غلطی یہ ہوتی ہے کہ وہاں کے لوگوں کی اندرونی طاقت اور جذبے کو کم سمجھا جاتا ہے۔ ٹیکنالوجی اپنی جگہ اہم ہے لیکن فیصلہ کن عنصر ہمیشہ عوام کی سوچ اور عزم ہوتا ہے۔قومی سلامتی کی وضاحت کرتے ہوئے انہوں نے کہا کہ یہ ایک پیچیدہ اور کثیر جہتی موضوع ہے۔ اکثر لوگ سمجھتے ہیں کہ سلامتی کا مطلب صرف سرحدوں پر موجود فوج ہے۔ لیکن حقیقت اس سے کہیں زیادہ بڑی ہے۔
انہوں نے کہا کہ کسی ملک کی سلامتی اس کی فوجی طاقت کے ساتھ ساتھ ٹیکنالوجی صلاحیت قدرتی وسائل سفارتی مہارت اور انسانی سرمایہ پر منحصر ہوتی ہے۔ انہوں نے قومی ارادہ کی اصطلاح استعمال کی اور کہا کہ یہی وہ طاقت ہے جو مشکل وقت میں ملک کو ٹوٹنے سے بچاتی ہے۔
#WATCH | Gandhinagar, Gujarat: At the convocation of Rashtriya Raksha University, NSA Ajit Doval says, "After a long time in history, we are seeing that in India, a new awakening has set in. National security is the responsibility of the entire country, and not just of the armed… pic.twitter.com/qKGdMZBOwj
— ANI (@ANI) April 14, 2026
انہوں نے عام لوگوں کے کردار پر بھی زور دیتے ہوئے کہا کہ آج ہندستان میں ایک نئی بیداری دیکھی جا رہی ہے۔ طویل عرصے بعد لوگ یہ سمجھنے لگے ہیں کہ قومی سلامتی صرف فوج پولیس یا خفیہ اداروں کی ذمہ داری نہیں ہے۔یہ پورے ملک کی مشترکہ ذمہ داری ہے۔ جب ہر شہری سلامتی کے بارے میں بیدار ہوتا ہے تو قومی حوصلہ بلند ہوتا ہے۔ یہی اجتماعی طاقت ملک کو مضبوط بناتی ہے۔
انہوں نے سلامتی کے میدان میں آنے والے نوجوانوں کے لئے ذہنی طاقت کو سب سے بڑا ہتھیار قرار دیا۔ انہوں نے کہا کہ علم اور مہارت کے ساتھ ٹیم ورک کی صلاحیت بھی ضروری ہے۔ انہوں نے کردار اور نظم و ضبط پر خاص زور دیا۔ ان کے مطابق عزم وہ اہم عنصر ہے جو کسی بھی پیشہ ور کو دوسروں سے ممتاز کرتا ہے۔
آخر میں انہوں نے اپنی اعزازی ڈگری قبول کرتے ہوئے عاجزی کا اظہار کیا اور اس اعزاز پر شکریہ ادا کیا۔ ان کی پوری تقریر ایک سبق کی طرح تھی۔ انہوں نے واضح کیا کہ سلامتی صرف ہتھیاروں یا سرکاری نظام کا نام نہیں بلکہ ایک احساس ہے جو ہر گھر اور ہر دل سے شروع ہوتا ہے۔ جب ملک کے تمام لوگ ایک مضبوط ارادے کے ساتھ کھڑے ہوتے ہیں تو دنیا کی کوئی طاقت ان کا حوصلہ نہیں توڑ سکتی۔ آج کا ہندستان اسی سمت میں آگے بڑھ رہا ہے جہاں سلامتی ایک عوامی تحریک بن چکی ہے۔
