نئی دہلی: عالمی یومِ ماحولیات کے موقع پر دہلی کی وزیرِ اعلیٰ ریکھا گپتا نے جمعہ کو میدان گڑھی میں اٹھارویں نمو آکسیجن پارک کا افتتاح کیا اور ماحولیاتی بیداری مہم کے تحت ایک پودا بھی لگایا۔ اس موقع پر شہر بھر میں سبز نقل و حمل اور شہری علاقوں میں شجرکاری کو فروغ دینے پر زور دیا گیا۔

نمو آکسیجن پارک منصوبے کا مقصد آلودگی میں کمی کے بارے میں عوامی شعور بڑھانا اور دہلی میں سرسبز ماحول کو فروغ دینا ہے۔ تقریب میں ماحولیات کے وزیر منجیندر سنگھ سرسا اور مرکزی وزیرِ ماحولیات بھویندر یادو نے بھی پودے لگائے۔ وزیرِ اعلیٰ ریکھا گپتا نے مرکزی وزیر بھویندر یادو کے ساتھ مل کر 18 نمو ون پارکوں کے قیام کا آغاز کیا۔

تقریب سے خطاب کرتے ہوئے ریکھا گپتا نے ہر پارک کے لیے مقامی نگرانی اور دیکھ بھال کی کمیٹی تشکیل دینے کی اپیل کی۔ انہوں نے کہا کہ حکومت نہ صرف شجرکاری کو فروغ دے رہی ہے بلکہ اس سال دہلی میں 15 لاکھ درخت اور پودے لگانے کا ہدف بھی مقرر کیا گیا ہے، جس پر عملدرآمد شروع ہو چکا ہے۔

انہوں نے مقامی باشندوں سے درختوں کی حفاظت اور نگہداشت میں حصہ لینے کی اپیل کرتے ہوئے کہا کہ عوامی شمولیت سے پودوں کی بہتر دیکھ بھال، آبپاشی اور تحفظ ممکن ہوگا، جس سے دہلی مزید سرسبز اور ماحول دوست بنے گی۔ ریکھا گپتا نے سوشل میڈیا پلیٹ فارم ایکس پر اپنے پیغام میں کہا کہ دہلی کو سرسبز بنانے میں ہر شہری کا کردار اہم ہے۔

انہوں نے بتایا کہ 18 نمو آکسیجن پارکوں پر کام شروع ہو چکا ہے اور حکومت دہلی بھر میں 100 آکسیجن پارکوں کے قیام کے وژن کی جانب پیش رفت کر رہی ہے۔ ان کے مطابق اس سال 15 لاکھ پودے لگائے جائیں گے، حکومت پودے اور مناسب مقامات فراہم کرے گی، جبکہ شہریوں سے اس مہم میں شامل ہونے کی اپیل کی گئی ہے۔

دریں اثنا، وزیرِ اعظم نریندر مودی نے عالمی یومِ ماحولیات کے موقع پر ماحولیات کے تحفظ کے لیے کام کرنے والے افراد کی کوششوں کو سراہا۔ انہوں نے کہا کہ گزشتہ برسوں میں بھارت میں سبز رقبے میں اضافہ ہوا ہے اور متعدد جنگلی جانوروں کی آبادی میں بھی نمایاں بہتری آئی ہے، جو ماحول کے تحفظ کے لیے جاری کوششوں کا نتیجہ ہے۔ واضح رہے کہ عالمی یومِ ماحولیات ہر سال 5 جون کو منایا جاتا ہے۔

اس کا آغاز 1972 میں اقوامِ متحدہ کی جنرل اسمبلی نے کیا تھا اور پہلی بار 1973 میں "صرف ایک زمین" کے موضوع کے تحت منایا گیا تھا۔ ہر سال اقوامِ متحدہ کا ماحولیاتی پروگرام (یو این ای پی) ایک مخصوص موضوع اور میزبان ملک کا انتخاب کرتا ہے تاکہ دنیا کو اہم ماحولیاتی مسائل کی جانب متوجہ کیا جا سکے۔