نئی دہلی: دہلی–این سی آر کے مسافروں کے لیے ’نمو بھارت ٹرین‘ اب صرف سفر کا ذریعہ نہیں، بلکہ زندگی کے خاص لمحات کو یادگار بنانے کا ایک نیا موقع بھی فراہم کرے گی۔ علاقائی ریلوے سروس چلانے والی این سی آر ٹی سی (نیشنل کیپٹل ریجن ٹرانسپورٹ کارپوریشن) نے ایک منفرد اقدام کا آغاز کیا ہے، جس کے تحت لوگ اپنے خصوصی مواقع جیسے سالگرہ، پری-ویڈنگ شوٹ، ذاتی تقریبات یا خوشی کے دیگر لمحات براہِ راست ’نمو بھارت ٹرین‘ میں منا سکیں گے۔

اس اقدام کے تحت کوئی بھی شخص، ایونٹ آرگنائزر یا فوٹو/ویڈیو پروڈکشن ٹیم ’نمو بھارت‘ کے کوچ کی ایڈوانس بکنگ کر سکتی ہے۔ تقریب ٹرین کے اسٹیشن پر کھڑے کوچ میں یا چلتی ہوئی ٹرین میں دونوں صورتوں میں منعقد کی جا سکتی ہے۔ اس کے لیے مقررہ فیس فی گھنٹہ 5,000 روپے سے شروع ہوتی ہے۔ مزید براں، بکنگ کے وقت سے پہلے اور بعد میں 30-30 منٹ کا اضافی وقفہ بھی دیا جائے گا تاکہ سجاوٹ لگانے اور ہٹانے میں آسانی ہو۔

تقریبات صبح 6 بجے سے رات 11 بجے کے درمیان منعقد کی جا سکتی ہیں اور پوری انتظامیہ اس طرح رکھی جائے گی کہ معمول کے ٹرین آپریشن اور مسافروں کو کوئی دقت نہ ہو۔ این سی آر ٹی سی کے مطابق، ’نمو بھارت‘ کا دلکش انٹیریئر، جدید ڈیزائن اور 160 کلومیٹر فی گھنٹہ کی رفتار اسے تقریبات کے لیے خاص اور یادگار مقام بناتے ہیں۔

اناند ویہار، غازی آباد اور میرٹھ ساؤتھ جیسے اسٹیشنوں پر اس کی دستیابی لوگوں کو اپنی تقریبات کے لیے ایک منفرد اور پریمیم ماحول فراہم کرتی ہے۔ اس کے علاوہ، دُہائی ڈپو میں موجود ماک-اپ کوچ بھی شوٹنگ اور تقریبات کے لیے دستیاب ہے۔ ان تقریبات کے دوران سیکیورٹی کو یقینی بنانے کے لیے ایونٹس این سی آر ٹی سی کے عملے اور سیکیورٹی کی نگرانی میں منعقد ہوں گے۔

منتظمین کو سجاوٹ کے مکمل اختیارات حاصل ہوں گے، البتہ اسے ٹرین اتھارٹی کے مقررہ معیار کے مطابق رکھنا لازمی ہوگا۔ این سی آر ٹی سی نے پہلے بھی ’نمو بھارت‘ کے اسٹیشنوں اور ٹرینوں کو فلم، ڈاکیومنٹری اور ٹی وی اشتہارات کی شوٹنگ کے لیے کرایہ پر فراہم کرنے کی پالیسی نافذ کی ہے۔ حال ہی میں منعقد ہونے والے فلم مقابلے میں ملک بھر کے نوجوان فلم سازوں نے ’نمو بھارت‘ کی انفراسٹرکچر پر مبنی شارٹ فلموں میں اپنی صلاحیت کا مظاہرہ کیا تھا۔

این سی آر ٹی سی کا خیال ہے کہ ہر دن ’نمو بھارت‘ سے سفر کرنے والے ہزاروں مسافروں کے پاس اپنی کہانیاں ہوتی ہیں – ملاقاتوں، خوابوں اور سفر کے تجربات کی۔ اب اس نئی پہل کے ساتھ لوگ اپنی خوشیاں ’نمو بھارت‘ کے ساتھ جوڑ کر اس کی کہانی کا حصہ بن سکیں گے۔