نئی دہلی: سپریم کورٹ نے ایک مسلم خاتون کے طلاق کے معاملے میں کہا ہے کہ شوہر کو وہ سارا سونا اور نقد رقم واپس کرنی ہوگی جو شادی کے وقت خاتون کے والد نے اسے دی تھی۔ عدالت نے کہا کہ طلاق یافتہ مسلم خواتین کے حقوق کے تحفظ کے لیے 1986 میں بنائے گئے قانون میں مساوات، وقار اور خودمختاری کو سب سے اوپر رکھا جانا چاہیے، اور خواتین کے عملی تجربات کو مدنظر رکھنا چاہیے، کیونکہ خاص طور پر چھوٹے شہروں اور دیہی علاقوں میں پنہاں پدرشاہی امتیاز آج بھی عام ہے۔

جسٹس سنجے کروَل اور جسٹس این کوٹیشور سنگھ کی بنچ نے کلکتہ ہائی کورٹ کے حکم کو منسوخ کر دیا۔ خاتون نے شادی کے وقت اپنے سابق شوہر کو دیے گئے سات لاکھ روپے نقد اور سونا واپس مانگا تھا، جسے ہائی کورٹ نے مسترد کر دیا تھا، جس کے بعد خاتون نے سپریم کورٹ کا دروازہ کھٹکھٹایا۔ درخواست گزار خاتون کا کہنا ہے کہ 2005 میں اس کی شادی ہوئی اور 2009 میں میاں بیوی الگ ہوگئے۔ 2011 میں دونوں نے طلاق لے لی۔

خاتون نے شادی کے وقت شوہر کو دیے گئے نقد اور سونے کی واپسی کے لیے اپیل کی، جس کی کل قیمت اُس نے 17.67 لاکھ روپے بتائی۔ خاتون نے یہ اپیل مسلم ویمن (پروٹیکشن آف رائٹس آن ڈیوورس) ایکٹ 1986 کی دفعہ 3 کے تحت دائر کی تھی۔ ہائی کورٹ نے اس بنیاد پر خاتون کے دعوے کو قبول کرنے سے انکار کر دیا کہ درخواست گزار کے والد اور شادی کروانے والے قاضی کے بیانات میں تضاد ہے۔

قاضی کا کہنا ہے کہ نکاح رجسٹر میں رقم درج تو کی گئی تھی لیکن وصول کنندہ کا نام درج نہیں تھا، جبکہ والد کا کہنا ہے کہ رقم دولہے کو دی گئی تھی۔ سپریم کورٹ نے کلکتہ ہائی کورٹ کے اس فیصلے کو منسوخ کر دیا جس میں شوہر کے حق میں فیصلہ سنایا گیا تھا اور اسے رقم و اشیا واپس کرنے سے رعایت دے دی گئی تھی۔ بنچ نے کہا کہ اس معاملے میں دو تشریحات ممکن ہیں، اور یہ قائم شدہ اصول ہے کہ یہ عدالت آئین کے آرٹیکل 136 کے تحت حاصل اختیارات کا استعمال صرف اس بنیاد پر نہیں کرتی کہ دو مختلف نقطۂ نظر ممکن ہیں۔

عدالت نے کہا کہ یہ استثنا اس معاملے پر لاگو نہیں ہوتا، کیونکہ ہائی کورٹ مقصدی تشریح کے اصول پر غور کرنے میں ناکام رہی اور اس نے اس معاملے کو محض ایک دیوانی تنازعے کے طور پر نمٹایا۔ عدالت نے کہا، ہندوستان کا آئین سب کے لیے ایک خواہش یعنی مساوات کا تعین کرتا ہے، جسے عملی طور پر حاصل کیا جانا ابھی باقی ہے۔ عدالتوں کو چاہیے کہ وہ اس سمت میں اپنا کردار ادا کرتے ہوئے اپنے استدلال کو سماجی انصاف سے متاثر فیصلوں پر مبنی رکھیں۔‘

سپریم کورٹ نے مزید کہا، ’’جب تناظر دیکھا جائے، تو 1986 کے قانون کا مقصد ایک مسلم مطلقہ خاتون کو طلاق کے بعد وقار اور معاشی تحفظ فراہم کرنا ہے، جو آئین کے آرٹیکل 21 کے تحت دیے گئے اس کے حقوق کے مطابق ہے۔ لہٰذا اس قانون کی تشریح کرتے وقت مساوات، وقار اور خودمختاری کو سب سے مقدم رکھا جانا ضروری ہے اور اسے خواتین کی حقیقی زندگی کے تجربات کی روشنی میں دیکھا جانا چاہیے، کیونکہ خاص طور پر چھوٹے شہروں اور دیہی علاقوں میں پنہاں پدرشاہی امتیاز آج بھی عام ہے۔

سپریم کورٹ نے خاتون کی اپیل کو قبول کرتے ہوئے ہائی کورٹ کے حکم کو منسوخ کر دیا۔ بنچ نے خاتون کے وکیل سے کہا کہ وہ فیصلے کی تاریخ سے تین کام کے دنوں کے اندر اس کے بینک اکاؤنٹ کی تفصیلات اور دیگر متعلقہ معلومات سابق شوہر کے وکیل کو فراہم کریں۔

عدالت نے کہا، رقم براہِ راست اپیل کنندہ (بیوی) کے بینک اکاؤنٹ میں منتقل کی جائے۔ مدعا علیہ (سابق شوہر) کو ہدایت دی جاتی ہے کہ وہ چھ ہفتوں کے اندر اس عدالت کی رجسٹری میں تعمیل کا حلف نامہ جمع کرائے۔ یہ تعمیل سرٹیفکیٹ ریکارڈ کا حصہ بنایا جائے گا۔ اگر مقررہ وقت پر ضروری کارروائی نہیں کی گئی تو مدعا علیہ کو نو فیصد سالانہ شرحِ سود کے ساتھ رقم ادا کرنی ہوگی۔