ممبئی/ آواز دی وائس

ممبئی میں جعلسازوں نے خود کو مرکزی تحقیقاتی بیورو (سی بی آئی) اور انفورسمنٹ ڈائریکٹوریٹ (ای ڈی) کے افسر ظاہر کر کے 72 سالہ ایک تاجر کو “ڈیجیٹل اریسٹ” کا نشانہ بنایا اور مبینہ طور پر 58 کروڑ روپے ہتھیا لیے۔ پولیس کے ایک افسر نے جمعرات کو یہ اطلاع دی۔ افسر کے مطابق، 58 کروڑ روپے کی یہ دھوکہ دہی “ڈیجیٹل اریسٹ” سے متعلق اب تک کی سب سے بڑی وارداتوں میں سے ایک ہو سکتی ہے۔ انہوں نے بتایا کہ اس معاملے کی تفتیش کر رہے مہاراشٹر سائبر شعبے نے تین افراد کو گرفتار کیا ہے۔

ڈیجیٹل اریسٹ” تیزی سے بڑھتا ہوا سائبر جرم ہے، جس میں جعلساز خود کو قانون نافذ کرنے والے افسران یا سرکاری ایجنسیوں کے ملازم ظاہر کرتے ہیں اور آڈیو/ویڈیو کال کے ذریعے متاثرہ شخص کو آن لائن قید میں رکھنے، ڈرانے اور دھمکانے کے ذریعے رقم حاصل کرنے پر مجبور کرتے ہیں۔ ایک افسر نے بتایا کہ موجودہ کیس میں جعلسازوں نے 19 اگست سے 8 اکتوبر کے درمیان خود کو ای ڈی اور سی بی آئی کے اہلکار ظاہر کر کے تاجر سے رابطہ کیا اور دعویٰ کیا کہ ان کا نام منی لانڈرنگ (رقوم کی دھلائی) کے ایک مقدمے میں آیا ہے۔

افسر کے مطابق، جعلسازوں نے تاجر اور ان کی اہلیہ کو ویڈیو کال کے ذریعے “ڈیجیٹل اریسٹ” میں لے کر خوفزدہ کیا اور انہیں اپنے بتائے گئے بینک کھاتوں میں رقم جمع کرنے کا حکم دیا۔ افسر نے بتایا کہ متاثرہ تاجر نے تقریباً دو مہینے کے اندر آر ٹی جی ایس کے ذریعے کئی بینک کھاتوں میں 58 کروڑ روپے منتقل کر دیے۔ بعد میں جب انہیں احساس ہوا کہ ان کے ساتھ دھوکہ دہی ہوئی ہے، تو انہوں نے سائبر پولیس سے شکایت درج کرائی۔

افسر کے مطابق، سائبر شعبے نے اس واقعے کے سلسلے میں ہندوستانی فوجداری ضابطہ (بی این ایس) اور انفارمیشن ٹیکنالوجی (آئی ٹی) ایکٹ کی متعلقہ دفعات کے تحت مقدمہ درج کیا ہے۔

تحقیقات کے دوران پولیس نے مالی لین دین کا تجزیہ کیا اور پایا کہ رقم کم از کم 18 بینک کھاتوں میں منتقل کی گئی تھی۔ افسر نے بتایا کہ سائبر پولیس نے فوری طور پر بینکوں سے رابطہ کر کے ان کھاتوں کو “فریز” کرنے کی درخواست کی۔

انہوں نے مزید کہا کہ پولیس نے دھوکہ دہی میں ملوث تین افراد کو گرفتار کر لیا ہے، جن کی شناخت عبدالخلی (47، رہائشی ملاد)، ارجن کڑواسرا (55، رہائشی ممبئی سینٹرل) اور جیتھارام (35) کے طور پر ہوئی ہے۔