فیض آباد:مسلم اسٹوڈنٹس آرگنائزیشن آف انڈیا (ایم ایس او) نے اپنے جاری "مدرسہ ٹو یونیورسٹی کنیکٹ" پروگرام کے تحت روناہی، فیض آباد کے ایک معروف دینی ادارے کے اساتذہ سے خصوصی ملاقات کی۔
ملاقات کے دوران تنظیم نے اس عزم کا اظہار کیا کہ وہ مدارس اور جدید تعلیمی اداروں کے درمیان ایک مضبوط رابطے کا کردار ادا کرے گی۔ تنظیم کا مقصد مدارس کے طلبہ کو فکری، تعلیمی اور پیشہ ورانہ مہارتوں سے آراستہ کرنا ہے تاکہ وہ اپنی دینی شناخت اور اسلامی اقدار کو برقرار رکھتے ہوئے جدید دور کے تقاضوں کے مطابق آگے بڑھ سکیں۔
ایم ایس او کے قومی صدر مولانا عارف الوحیدی نے کہا کہ اس مہم کے تحت مدارس کے طلبہ کے لیے باقاعدہ کیریئر رہنمائی اور تعلیمی مشاورتی پروگرام منعقد کیے جائیں گے۔ ان پروگراموں میں اعلیٰ تعلیم، مسابقتی امتحانات، اسکالرشپس، فنی و پیشہ ورانہ کورسز اور مختلف شعبوں میں روزگار کے مواقع سے متعلق معلومات فراہم کی جائیں گی۔
انہوں نے کہا کہ اس اقدام کا مقصد طلبہ کو بہتر تعلیمی مواقع اور کامیاب پیشہ ورانہ مستقبل کے لیے تیار کرنا ہے تاکہ وہ معاشرے میں مؤثر کردار ادا کر سکیں۔
"مدرسہ ٹو یونیورسٹی کنیکٹ" مہم ایم ایس او کے اس وسیع وژن کا حصہ ہے جس کے تحت دینی اداروں اور مرکزی دھارے کے تعلیمی مراکز کے درمیان تعمیری روابط کو فروغ دیا جا رہا ہے۔
وفد میں ابو اشرف ذیشان، ارشد خان رضوی اور قمر انجم فیضی شامل تھے۔
