نئی دہلی: لوک سبھا سیکریٹریٹ نے مغربی بنگال میں بھارتیہ جنتا پارٹی (بی جے پی) کے رکن پارلیمنٹ کھاگن مرمو پر ہوئے حملے کے سلسلے میں وزارتِ داخلہ سے تین دن کے اندر ایک حقائق پر مبنی رپورٹ طلب کی ہے۔ مرمو اور بی جے پی کے رکن اسمبلی شنکر گوش پیر کے روز مغربی بنگال کے شمالی حصے میں سیلاب اور زمین کھسکنے سے متاثرہ علاقوں کے دورے پر تھے۔
اس دوران ان پر ہجوم نے حملہ کیا، جس میں وہ زخمی ہو گئے۔ پارلیمنٹ کے عہدیداروں نے بتایا کہ لوک سبھا سیکریٹریٹ نے وزارتِ داخلہ کو ایک خط لکھ کر مغربی بنگال حکومت سے تین دن کے اندر اس واقعے پر ایک "حقائق پر مبنی نوٹ" بھیجنے کو کہا ہے۔ مالدہ سے لوک سبھا کے رکن مرمو پر یہ حملہ جلپائی گوڑی کے دوارز علاقے میں اس وقت ہوا جب وہ سیلاب سے متاثرہ مقامات پر راحت اور بچاؤ کے کاموں کا جائزہ لے رہے تھے۔
پولیس نے اس حملے کے بعد آٹھ افراد کے خلاف ایف آئی آر درج کی ہے۔ پولیس کا کہنا ہے کہ واقعے کی ویڈیو فوٹیج حاصل ہو گئی ہے اور ملزمان کی شناخت کی جا رہی ہے۔ بی جے پی کا الزام ہے کہ رکن پارلیمنٹ مرمو اور رکن اسمبلی شنکر گوش پر حملہ مقامی افراد اور ترنمول کانگریس (ٹی ایم سی) کے حامیوں نے کیا۔ شنکر گوش نے کہا کہ انہیں “مکے مار کر اور پتھر پھینک کر زخمی کیا گیا۔” اس واقعے نے سیاسی تنازع بھی کھڑا کر دیا ہے۔
وزیر اعظم نریندر مودی نے اس حملے کی مذمت کرتے ہوئے کہا کہ ریاستی حکومت اور ترنمول کانگریس کو ایسی مشکل گھڑی میں عوام کی مدد پر توجہ دینی چاہیے، نہ کہ تشدد میں الجھنے پر۔ وہیں وزیر اعلیٰ ممتا بنرجی نے وزیر اعظم پر قدرتی آفت کو سیاسی رنگ دینے کا الزام عائد کیا۔ بی جے پی کا کہنا ہے کہ ان کے رہنما سیلاب اور زمین کھسکنے سے متاثرہ افراد کی مدد کے لیے گئے تھے، لیکن انہیں مشتعل ہجوم نے روک دیا۔
اپوزیشن لیڈر شبھندو ادھیکاری نے حملہ آوروں کی تصاویر جاری کر کے ترنمول کانگریس پر الزام لگایا کہ وہ ریاست میں قانون و نظم برقرار رکھنے میں ناکام رہی ہے۔ پولیس نے معاملے کی تفتیش شروع کر دی ہے اور جلد ہی مزید کارروائی کی جائے گی۔
