نئی دہلی: الیکشن کمیشن نے منگل کے روز مدھیہ پردیش کی مسودہ ووٹر لسٹ جاری کر دی ہے، جس میں خصوصی گہری نظرثانی (SIR) کے بعد 42.74 لاکھ ووٹروں کے نام حذف کر دیے گئے ہیں۔ ریاستی الیکشن کمیشن کے مطابق مدھیہ پردیش میں کل 5 کروڑ 74 لاکھ 6 ہزار 143 ووٹرز درج تھے، جن میں سے 5 کروڑ 31 لاکھ 31 ہزار 983 ووٹروں نے اپنے گنتی فارم جمع کروائے۔
الیکشن کمیشن نے یہ بھی بتایا کہ آج کیرالہ اور چھتیس گڑھ کی مسودہ ووٹر لسٹیں بھی جاری کی جائیں گی۔ مسودہ فہرست سے حذف کیے گئے ووٹروں میں سے 31.51 لاکھ وہ افراد تھے جو یا تو اپنے پتے سے منتقل ہو چکے تھے یا دستیاب نہیں پائے گئے، جبکہ 8.46 لاکھ ووٹرز فوت شدہ پائے گئے۔ اس کے علاوہ 2.77 لاکھ ووٹروں کے نام ایک سے زیادہ مقامات پر درج پائے گئے تھے۔
مدھیہ پردیش الیکشن کمیشن نے وضاحت کی ہے کہ بعض ووٹروں سے گنتی فارم موصول نہیں ہو سکے، جس کی وجوہات میں کسی اور ریاست میں اندراج، فرد کا وجود میں نہ ہونا، مقررہ مدت میں فارم جمع نہ کرنا یا خود ووٹر کی جانب سے رجسٹریشن میں عدم دلچسپی شامل ہے۔ ایک سے زائد مقامات پر درج ووٹروں کے نام صرف ایک ہی جگہ برقرار رکھے جائیں گے۔
اس سے قبل الیکشن کمیشن نے گزشتہ ہفتے تمل ناڈو اور گجرات کی مسودہ ووٹر لسٹیں بھی جاری کی تھیں، جن میں مجموعی طور پر ڈیڑھ کروڑ سے زائد ووٹروں کے نام حذف کیے گئے۔ تمل ناڈو میں 97.37 لاکھ اور گجرات میں 73.73 لاکھ ووٹروں کے نام فہرست سے ہٹائے گئے۔ گجرات میں کل 5.08 کروڑ ووٹروں میں سے صرف 4.34 کروڑ کو درست مانا گیا، جبکہ تمل ناڈو میں 6.41 کروڑ میں سے 5.43 کروڑ ووٹروں کو ہی معتبر قرار دیا گیا۔
ضلع سطح کے اعداد و شمار کے مطابق تمل ناڈو کے کئی اضلاع میں بڑے پیمانے پر نام حذف کیے گئے ہیں۔ کوئمبٹور میں تقریباً 6.50 لاکھ ووٹروں کے نام مسودہ فہرست سے نکالے گئے، جبکہ ڈنڈیگل ضلع میں 2.34 لاکھ ووٹرز کے نام حذف ہونے سے ووٹر تعداد 19.35 لاکھ سے گھٹ کر 16.09 لاکھ رہ گئی۔ سب سے زیادہ اثر دارالحکومت چینئی میں دیکھا گیا، جہاں 14.25 لاکھ ووٹروں کے نام ہٹائے جانے کے بعد کل ووٹر تعداد 40.04 لاکھ سے کم ہو کر 25.79 لاکھ رہ گئی۔
اسی طرح کرور ضلع میں تقریباً 79 ہزار اور کانچی پورم میں 2.74 لاکھ ووٹروں کے نام فہرست سے خارج کیے گئے۔ قابلِ ذکر ہے کہ الیکشن کمیشن اس سے قبل ووٹر لسٹ کی نظرثانی کی آخری تاریخ دو مرتبہ بڑھا چکا ہے۔ 30 نومبر کو کمیشن نے 12 ریاستوں میں خصوصی گہری نظرثانی کی ڈیڈ لائن بڑھانے کا اعلان کیا تھا، جس کے تحت یہ عمل 11 دسمبر تک جاری رہنا تھا، تاہم بعد میں اس میں مزید توسیع کی گئی۔
