نئی دہلی: مدھیہ پردیش اسمبلی میں پیر کے روز معروف پلے بیک سنگر آشا بھوسلے اور دیگر نامور شخصیات کے انتقال پر تعزیت کا اظہار کیا گیا اور ان کے احترام میں ایوان کی کارروائی 30 منٹ کے لیے ملتوی کر دی گئی۔

لوک سبھا اور ریاستی اسمبلیوں میں خواتین کے لیے 33 فیصد ریزرویشن کو 2029 کے لوک سبھا انتخابات سے نافذ کرنے سے متعلق آئینی ترمیمی بل منظور نہ ہونے کے بعد مدھیہ پردیش میں بھارتیہ جنتا پارٹی (بی جے پی) کی قیادت والی حکومت نے اسمبلی کا ایک روزہ خصوصی اجلاس طلب کیا ہے۔

حکومت کی جانب سے بحث کا موضوع "ناری شکتی وندن خواتین کی ہمہ جہتی ترقی اور ان کا بااختیار بنانا" رکھا گیا ہے۔ اس اجلاس کے دوران اس معاملے پر بی جے پی اور اپوزیشن کانگریس کے درمیان کشیدگی بھی دیکھنے میں آئی۔ وزیراعلیٰ موہن یادو، قائد حزب اختلاف اومنگ سنگھار اور کانگریس رکن راجندر کمار نے مرحوم شخصیات کی خدمات کو اجاگر کرتے ہوئے انہیں خراجِ عقیدت پیش کیا۔