پٹنہ: بہار کے وزیر اعلیٰ سمراٹ چودھری نے پیر کو ویشالی اور بھاگلپور میں سیلاب متاثرین کے لیے چلائے جا رہے کمیونٹی کچن کا معائنہ کیا اور راحت و بچاؤ کے کاموں کا جائزہ لیا۔ گنگا، گنڈک، کوسی، پون پون سمیت کئی ندیوں کی سطح آب میں اضافے کے باعث ریاست کے 12 اضلاع کے نشیبی علاقوں میں سیلاب کا پانی پھیل گیا ہے، جس سے 22 لاکھ سے زیادہ افراد متاثر ہوئے ہیں۔

حکام کے مطابق نائب وزیر اعلیٰ وجے کمار چودھری کے ساتھ دورے پر پہنچے وزیر اعلیٰ نے افسران کو پشتوں کی مسلسل نگرانی کرنے، حساس علاقوں پر خصوصی نظر رکھنے اور راحت و بچاؤ کے کاموں میں کسی بھی قسم کی غفلت نہ برتنے کی ہدایت دی۔ انہوں نے بتایا کہ سیلاب متاثرین کے لیے مختلف اضلاع میں اس وقت 190 کمیونٹی کچن چلائے جا رہے ہیں۔

متاثرہ علاقوں سے لوگوں کو محفوظ مقامات پر منتقل کرنے اور آمدورفت برقرار رکھنے کے لیے 1,429 کشتیاں تعینات کی گئی ہیں۔ ریاستی حکومت نے تمام ضلعی مجسٹریٹوں اور متعلقہ افسران کو پانی کی سطح، پشتوں، حساس مقامات اور نشیبی علاقوں کی مسلسل نگرانی کرنے اور ضرورت کے مطابق احتیاطی اقدامات کرنے کی ہدایت دی ہے۔ انجینئروں سے کہا گیا ہے کہ وہ سیلاب پر قابو پانے سے متعلق وسائل اور مشینری تیار رکھیں۔ متاثرہ علاقوں کے لوگوں کو دریا کے کنارے نہ جانے اور پوری احتیاط برتنے کا مشورہ دیا گیا ہے۔

مقامی انتظامیہ کو کشتیوں کے آپریشن کی نگرانی، گنجائش سے زیادہ مسافروں کو سوار ہونے سے روکنے اور لوگوں کو صورتحال سے باقاعدگی سے آگاہ کرنے کی ہدایت بھی دی گئی ہے۔ پیر کی صبح چھ بجے پٹنہ کے گاندھی گھاٹ پر گنگا کی سطح آب 50.41 میٹر ریکارڈ کی گئی، جو خطرے کے نشان سے 1.57 میٹر بلند ہے۔ وہیں دیگھا گھاٹ پر پانی کی سطح 43.52 میٹر رہی، جو خطرے کے نشان سے 1.75 میٹر زیادہ ہے۔

حکام نے بتایا کہ ریاست میں گنڈک ندی ڈمریا گھاٹ اور حاجی پور، کوسی بلتارا اور کرسیلا، بوڑھی گنڈک کھگڑیا، گنگا ہاتھیدہ، بھاگلپور، کہل گاؤں، بکسر اور مونگیر، پون پون سری پال پور، باگمتی بینی آباد اور گھاگھرا درولی میں خطرے کے نشان سے اوپر بہہ رہی ہیں۔ انہوں نے بتایا کہ بہار اور پڑوسی ریاست جھارکھنڈ میں ہوئی شدید بارش کے باعث مختلف شہروں میں ندیوں کی سطح آب مسلسل بڑھ رہی ہے۔ ستمبر میں اب تک ریاست میں 69.1 ملی میٹر بارش ریکارڈ کی گئی ہے، جو معمول سے 55 فیصد زیادہ ہے۔