پٹنہ: بہار میں سیلاب کی صورت حال مزید سنگین ہوگئی ہے اور ریاست کے 13 اضلاع میں 34 لاکھ سے زائد افراد متاثر ہوئے ہیں۔ حکام نے منگل کو بھاگلپور ضلع کے سلطان گنج میں گنگا ندی کا پانی ’’سیلاب کی سطح‘‘ سے تجاوز کرنے کے بعد زیریں علاقوں میں الرٹ جاری کیا ہے۔ حکام کے مطابق آج صبح بھاگلپور ضلع کے سیلاب سے متاثرہ کھارک راگھوپور علاقے میں ایک چھوٹی کشتی الٹ گئی۔

ریاستی ڈیزاسٹر ریسپانس فورس (SDRF) کے اہلکاروں نے کشتی میں سوار تمام 10 افراد کو بحفاظت بچا لیا۔ بہار کے 13 اضلاع میں تقریباً 34.31 لاکھ افراد سیلاب سے متاثر ہوئے ہیں۔ ان اضلاع میں پٹنہ، بھاگلپور، ویشالی، سارن، بیگوسرائے، کھگڑیا اور مونگیر شامل ہیں۔ سیلاب نے 480 گرام پنچایتوں کو متاثر کیا ہے۔ پیر کو تقریباً 29.13 لاکھ افراد سیلاب سے متاثر ہوئے تھے، جب متعدد دریاؤں میں پانی خطرناک حد تک بڑھنے کے باعث 13 اضلاع کے بڑے علاقوں میں پانی داخل ہوگیا تھا۔ بہار میٹرولوجیکل سروس سینٹر کے مطابق ستمبر میں اب تک ریاست میں 79.6 ملی میٹر بارش ریکارڈ کی گئی ہے، جو معمول سے 31 فیصد زیادہ ہے۔

محکمہ ڈیزاسٹر مینجمنٹ نے ایک بیان میں کہا، ’’8 ستمبر کو صبح 8 بجے بھاگلپور کے سلطان گنج میں گنگا کی سطح آب 36.80 میٹر ریکارڈ کی گئی، جو 17 اگست 2021 کو ریکارڈ کی گئی 36.75 میٹر کی سابقہ بلند ترین سیلابی سطح (HFL) سے تجاوز کر گئی ہے۔ تاہم پانی کی سطح کا رجحان فی الحال مستحکم ہے۔‘‘ گنڈک، کوسی، بوڑھی گنڈک، گنگا، پون پون، باگمتی اور گھاگھرا سمیت کئی ندیاں متعدد مقامات پر خطرے کے نشان سے اوپر بہہ رہی ہیں۔ گنڈک ندی کا پانی ڈمریا گھاٹ اور حاجی پور، کوسی کا بلتارا اور کرسیلا، بوڑھی گنڈک کا کھگڑیا جبکہ گنگا کا پانی دیگھا، گاندھی گھاٹ، ہاتھیداہ، بھاگلپور، کہل گاؤں اور مونگیر میں خطرے کی سطح سے اوپر ہے۔

محکمہ نے بتایا کہ سیلاب متاثرین کے لیے مختلف اضلاع میں 432 کمیونٹی کچن چلائے جا رہے ہیں۔ اس کے علاوہ 14 امدادی کیمپ بھی قائم ہیں، جہاں متاثرین کے قیام، کھانے، طبی امداد اور دیگر ضروری سہولیات کا انتظام کیا گیا ہے۔ اب تک سیلاب متاثرین میں تقریباً 1.29 لاکھ پلاسٹک شیٹس اور تقریباً 22,900 خشک راشن کے پیکٹ تقسیم کیے جا چکے ہیں۔

محکمہ ڈیزاسٹر مینجمنٹ کے مطابق لوگوں کے انخلا اور آمدورفت میں سہولت کے لیے مجموعی طور پر 1,832 کشتیاں چلائی جا رہی ہیں۔ اس کے علاوہ اب تک مویشیوں کے لیے 3,142 کوئنٹل چارہ بھی تقسیم کیا گیا ہے۔ ریاست کے بڑے بیراجوں سے پانی کے اخراج کے بارے میں محکمہ نے بتایا کہ منگل کو صبح 10 بجے گنڈک بیراج سے 1,04,400 کیوسک پانی چھوڑا جا رہا تھا اور اس کا رجحان مستحکم ہے۔ رواں سال اب تک سب سے زیادہ اخراج 14 جولائی کو 2,24,000 کیوسک ریکارڈ کیا گیا تھا۔

کوسی بیراج سے صبح 10 بجے 1,69,985 کیوسک پانی کا اخراج ریکارڈ کیا گیا، جس میں کمی کا رجحان ہے۔ رواں سال اس بیراج سے سب سے زیادہ 2,55,425 کیوسک پانی 20 جولائی کو چھوڑا گیا تھا۔ ریاست کے مختلف اضلاع میں امدادی اور بچاؤ کی کارروائیوں کے لیے مجموعی طور پر SDRF کی 27 اور NDRF کی 10 ٹیمیں تعینات کی گئی ہیں۔