نئی دہلی: مرکزی ویجلنس کمیشن (سی وی سی) نے اپنی تازہ رپورٹ میں کہا ہے کہ مرکزی تفتیشی بیورو (سی بی آئی) کی جانب سے تفتیش کیے گئے بدعنوانی کے 7,200 سے زائد مقدمات عدالتوں میں سماعت کے لیے زیرِ التوا ہیں، جن میں سے 409 مقدمات دو دہائیوں سے بھی زیادہ پرانے ہیں۔

سی وی سی کی رپورٹ کے مطابق 31 دسمبر 2025 تک عدالتوں میں سماعت کے لیے زیرِ التوا مجموعی 7,229 مقدمات میں سے 1,612 مقدمات تین سال سے کم عرصے سے، 860 مقدمات تین سے پانچ سال سے اور 1,901 مقدمات پانچ سے 10 سال سے زیرِ التوا ہیں۔ سی وی سی کی سالانہ رپورٹ 2025 کے مطابق بدعنوانی کی روک تھام کے قانون کے تحت 2,447 مقدمات 10 سے 20 سال سے جبکہ 409 مقدمات 20 سال سے زائد عرصے سے عدالتوں میں زیرِ سماعت ہیں۔

کمیشن نے بتایا کہ ہائی کورٹس اور سپریم کورٹ میں تقریباً 14,083 اپیلیں اور نظرثانی کی درخواستیں، جن میں رِٹ درخواستیں بھی شامل ہیں، زیرِ التوا ہیں۔ رپورٹ کے مطابق ان میں سے 739 مقدمات 20 سال سے زائد عرصے سے، 1,347 مقدمات 15 سے 20 سال سے اور 3,161 مقدمات 10 سے 15 سال سے زیرِ التوا ہیں۔ رپورٹ کے مطابق ایسی 3,854 اپیلیں اور نظرثانی کی درخواستیں پانچ سے 10 سال سے زیرِ التوا ہیں، 1,987 مقدمات دو سے پانچ سال سے جبکہ 2,995 مقدمات دو سال سے کم عرصے سے زیرِ التوا ہیں۔

رپورٹ میں بتایا گیا ہے کہ سی بی آئی کے پاس بدعنوانی کے 473 مقدمات کی تفتیش بھی زیرِ التوا ہے۔ ان میں 39 مقدمات پانچ سال سے زیادہ عرصے سے، 37 مقدمات تین سے پانچ سال سے اور 33 مقدمات دو سے تین سال سے زیرِ تفتیش ہیں۔ 31 دسمبر 2025 تک 72 مقدمات ایک سے دو سال سے جبکہ 292 مقدمات ایک سال سے بھی کم عرصے سے تفتیش کے لیے زیرِ التوا تھے۔ رپورٹ میں کہا گیا ہے، ’’سی بی آئی سے توقع کی جاتی ہے کہ مقدمہ درج ہونے کے ایک سال کے اندر تفتیش مکمل کر لے۔ تفتیش مکمل ہونے کا مطلب یہ ہے کہ جہاں ضروری ہو، مجاز افسر سے منظوری حاصل کرنے کے بعد عدالت میں چارج شیٹ داخل کی جائے۔‘

‘ تاہم، رپورٹ میں کہا گیا ہے کہ بعض مقدمات میں تفتیش مکمل ہونے میں تاخیر دیکھی گئی ہے۔ ان میں درخواستِ تعاون (Letter Rogatory) کے جواب ملنے میں تاخیر اور بے حساب اثاثوں کے مقدمات میں دستاویزات اور ’ٹائٹل ڈیڈ‘ وغیرہ کی جانچ پڑتال میں لگنے والا وقت شامل ہے۔