نئی دہلی: چار ماہ پر مشتمل مانسون کا موسم منگل کے روز ختم ہو گیا اور اس دوران ملک میں عام اوسط کے مقابلے آٹھ فیصد زیادہ بارش ریکارڈ کی گئی۔ یہ اطلاع ہندوستانی محکمہ موسمیات (آئی ایم ڈی) نے دی۔ آئی ایم ڈی کے سربراہ مرتیونجے مہاپاترا نے کہا کہ ملک میں مانسون کا موسم "بہت کامیاب" رہا، اگرچہ اس دوران بادل پھٹنے اور لینڈ سلائیڈنگ جیسی کئی آفات بھی آئیں۔

ہندوستان میں چار مہینوں کے مانسون کے دوران 868.6 ملی میٹر کی عام بارش کے مقابلے 937.2 ملی میٹر بارش ریکارڈ کی گئی، جو آٹھ فیصد زیادہ ہے۔ مشرقی اور شمال مشرقی ہندوستان میں 1089.9 ملی میٹر بارش ہوئی، جو عام اوسط 1367.3 ملی میٹر سے 20 فیصد کم ہے۔ مہاپاترا نے بتایا کہ بہار، اروناچل پردیش، آسام اور میگھالیہ میں مانسون کے چار مہینوں میں سے تین مہینوں میں کم بارش ریکارڈ ہوئی۔

انہوں نے ایک آن لائن پریس کانفرنس میں کہا: "اس مانسون میں مشرقی اور شمال مشرقی ہندوستان میں بارش 1901 کے بعد دوسری سب سے کم رہی۔ اس خطے میں سب سے کم بارش (1065.7 ملی میٹر) 2013 میں درج کی گئی تھی۔" انہوں نے مزید کہا: "حالیہ وقت میں مشرقی اور شمال مشرقی ہندوستان میں کئی سالوں سے کم بارش ہو رہی ہے۔ سن 2020 سے اس خطے میں کم بارش کا رجحان ہے۔

مطالعات سے یہ بھی پتہ چلتا ہے کہ پچھلے 20 برسوں میں اس علاقے میں بارش کم ہوئی ہے۔" مہاپاترا نے کہا کہ شمال مغربی ہندوستان میں 747.9 ملی میٹر بارش ریکارڈ کی گئی، جو عام اوسط (587.6 ملی میٹر) سے 27.3 فیصد زیادہ ہے۔ انہوں نے کہا کہ یہ 2001 کے بعد سب سے زیادہ اور 1901 کے بعد چھٹی سب سے زیادہ بارش ہے۔

انہوں نے بتایا کہ شمال مغربی ہندوستان کے تمام اضلاع میں جون، اگست اور ستمبر میں عام سے زیادہ بارش ہوئی۔ انہوں نے کہا کہ وسطی ہندوستان میں 1125.3 ملی میٹر بارش ہوئی، جو عام اوسط 978 ملی میٹر سے 15.1 فیصد زیادہ ہے، جبکہ جنوبی خطے میں 716.2 ملی میٹر کی عام اوسط کے مقابلے 9.9 فیصد زیادہ بارش ریکارڈ ہوئی۔

مہاپاترا نے کہا کہ شمال مغرب کے کچھ حصوں کو چھوڑ کر ملک کے بیشتر علاقوں میں اکتوبر سے دسمبر تک عام سے زیادہ بارش ہونے کا امکان ہے۔ انہوں نے کہا کہ ہندوستان میں اکتوبر کے مہینے میں بھی عام سے زیادہ بارش کا امکان ہے، جو طویل مدتی اوسط 75.4 ملی میٹر کے مقابلے 115 فیصد زیادہ رہ سکتی ہے۔