نئی دہلی: مرکزی وزیر داخلہ امت شاہ نے منگل کے روز کہا کہ ’’کرما یوگی‘‘ نریندر مودی نے آج ہی کے دن 24 سال قبل گجرات کے وزیراعلیٰ کے طور پر آئین کی قسم اٹھائی تھی اور عوامی خدمت کے اپنے طویل سفر کے دوران یہ ثابت کر دیا کہ جب وژن ’قوم اول‘ اور مشن ’ترقی یافتہ بھارت‘ ہو، تو قیادت لاکھوں لوگوں کی زندگیوں میں کیسے تبدیلی لا سکتی ہے۔

گجرات کے وزیراعلیٰ کے طور پر مسلسل تین اسمبلی انتخابات میں بی جے پی کو کامیابی دلانے کے بعد، مودی 2014 سے وزیرِ اعظم کے طور پر بی جے پی کی قیادت والے نیشنل ڈیموکریٹک الائنس (این ڈی اے) کی قیادت کر رہے ہیں اور مسلسل تین قومی انتخابات جیت چکے ہیں۔

امت شاہ نے ’ایکس‘ پر لکھا، ’’قوم اور عوامی خدمت کے لیے وقف 24 سال! یہ دن پورے ملک کے لیے نہایت اہمیت رکھتا ہے، جب بے غرض انداز میں عوامی خدمت کے لیے وقف ایک کرما یوگی نے آئین کی قسم اٹھائی، لوگوں کے مسائل کو اپنا مسئلہ مانا، ان کے حل کا آغاز کیا اور یہ مسائل تاریخ بنتے چلے گئے۔‘‘

وزیر داخلہ نے کہا کہ ان 24 سالوں میں، چاہے گجرات کے کسانوں، خواتین، صنعت اور تعلیم میں انقلابی تبدیلی لانا ہو یا وزیرِ اعظم کے طور پر ملک کی سلامتی، غریبوں کی بہبود اور پسماندہ، دلت اور قبائلی کمیونٹیز سمیت تمام طبقات کی ترقی کرنی ہو، مودی جی نے یہ ثابت کر دیا کہ جب وژن ’قوم اول‘ ہو اور مشن ’ترقی یافتہ بھارت‘، تو ایک قیادت لاکھوں لوگوں کی زندگیوں میں تبدیلی لا سکتی ہے۔

مودی کو اپنے دورِ حکومت کے دوران کبھی انتخابی شکست کا سامنا نہیں کرنا پڑا اور تمام وزرائے اعظم میں سب سے طویل عرصے تک حکومت چلانے کا ریکارڈ ان کے نام ہے، جس میں وزیراعلیٰ کے طور پر ساڑھے 12 سال سے زائد کا ان کا دور بھی شامل ہے۔