نئی دہلی/ آواز دی وائس
سابق گورنر ستیہ پال ملک کا انتقال منگل، یعنی 5 اگست کو ہو گیا۔ وہ طویل عرصے سے علیل تھے اور اسپتال میں داخل تھے۔ وزیر اعظم نریندر مودی نے بھی ستیہ پال ملک کے انتقال پر افسوس کا اظہار کیا۔ وزیر اعظم نے ایکس پر ایک پوسٹ میں لکھا کہ ستیہ پال ملک جی کے انتقال پر غمگین ہوں۔ اس دکھ کی گھڑی میں میری ہمدردیاں ان کے اہلِ خانہ اور حامیوں کے ساتھ ہیں۔ اوم شانتی۔
رام منوہر لوہیا اسپتال میں زیرِ علاج
ستیہ پال ملک کی عمر 79 سال تھی اور وہ دہلی کے رام منوہر لوہیا اسپتال میں کافی وقت سے زیرِ علاج تھے۔ وہیں انہوں نے آخری سانس لی۔ کچھ دن قبل ان کی ایک تصویر منظر عام پر آئی تھی، جس میں ان کی حالت کافی نازک نظر آ رہی تھی۔ ستیہ پال ملک طالب علمی کے زمانے سے ہی سیاست میں سرگرم ہو گئے تھے اور آگے چل کر گورنر کے عہدے تک پہنچے۔
شاندار مگر بغاوت سے بھرپور سیاسی سفر
ستیہ پال ملک کا سیاسی سفر شاندار رہا، مگر وہ کسی ایک سیاسی جماعت میں زیادہ دنوں تک نہیں ٹک سکے۔ انہوں نے پہلی بار باغپت اسمبلی سیٹ سے انتخاب لڑا اور جیت حاصل کی۔ اس وقت وہ ہندوستانی کرانتی دل کے ٹکٹ پر کامیاب ہوئے تھے، جس کی قیادت چودھری چرن سنگھ کر رہے تھے۔
جب چودھری چرن سنگھ نے راشٹریہ لوک دل قائم کی، تو ستیہ پال ملک اس کے جنرل سکریٹری بن گئے، اور 1980 میں اسی جماعت کے ٹکٹ پر راجیہ سبھا کے رکن منتخب ہوئے۔ تاہم، 1984 میں انہوں نے کانگریس میں شمولیت اختیار کی، لیکن جیسے ہی بوفورس اسکینڈل میں سابق وزیر اعظم راجیو گاندھی کا نام آیا، تو ستیہ پال ملک نے کانگریس چھوڑ دی۔
وزیر اعظم مودی نے گورنر بنایا
۔1989 میں ستیہ پال ملک نے علی گڑھ سے جنتا دل کے ٹکٹ پر لوک سبھا کا انتخاب جیتا، لیکن اس کے بعد وہ کوئی بھی انتخاب نہ جیت سکے۔ 1996 میں انہوں نے سماج وادی پارٹی کے ٹکٹ پر الیکشن لڑا، مگر ہار گئے۔ 2004 کے عام انتخابات میں انہوں نے بی جے پی کے ٹکٹ پر باغپت سے قسمت آزمائی کی، لیکن پھر بھی کامیابی نہ ملی۔
۔2012 میں بی جے پی نے انہیں پارٹی کا قومی نائب صدر بنایا، اور 2017 میں انہیں بہار کا گورنر مقرر کر دیا گیا۔ بعد ازاں ستیہ پال ملک کو جموں و کشمیر کا گورنر بنایا گیا۔ انہی کے دورِ حکومت میں آرٹیکل 370 کو ہٹایا گیا۔
بعد میں تبادلہ، اور الزامات کا سلسلہ
بعد میں ستیہ پال ملک کو میگھالیہ کا گورنر بنا کر بھیج دیا گیا۔ گورنر کے طور پر خدمات انجام دینے کے بعد انہوں نے مودی حکومت پر بدعنوانی کے کئی الزامات لگائے۔ انہوں نے وزیر اعظم مودی پر بھی کئی سنگین الزامات عائد کیے، جن پر تفتیش بھی کی گئی۔
