نئی دہلی: سپریم کورٹ آف انڈیا نے جمعہ کے روز ایک 15 سالہ لڑکی کو سات ماہ سے زائد کی حاملہ ہونے کے باوجود طبی طور پر اسقاطِ حمل کی اجازت دیتے ہوئے کہا کہ کسی بھی خاتون، خصوصاً نابالغ کو اس کی مرضی کے خلاف پوری مدت تک حمل جاری رکھنے پر مجبور نہیں کیا جا سکتا۔

جسٹس بی وی ناگرتنا اور جسٹس اجول بھوئیاں پر مشتمل بنچ نے کہا کہ پیدا ہونے والے بچے کے مقابلے میں حاملہ خاتون کی خواہش زیادہ اہم ہے۔ عدالت نے زور دیا کہ ایسے حالات میں حمل جاری رہنے سے نابالغ کے ذہنی صحت، تعلیمی امکانات، سماجی حیثیت اور مجموعی ترقی پر طویل مدتی منفی اثرات پڑ سکتے ہیں۔

عدالت عظمیٰ نے کہا کہ خاتون کی تولیدی خودمختاری کو سب سے زیادہ اہمیت دی جانی چاہیے۔ اگر کسی عورت کو ناپسندیدہ حمل جاری رکھنے پر مجبور کیا جاتا ہے تو یہ اس کے آئینی حقوق کی خلاف ورزی ہوگی۔ بنچ نے کہا، ’’اپنے جسم سے متعلق فیصلے کرنے کا حق، خاص طور پر تولیدی معاملات میں، آئین کے آرٹیکل 21 کے تحت شخصی آزادی اور رازداری کا لازمی حصہ ہے۔

اس حق کو غیر معقول پابندیوں کے ذریعے ختم نہیں کیا جا سکتا، خاص طور پر نابالغوں اور ناپسندیدہ حمل جیسے معاملات میں۔‘‘ عدالت نے مزید کہا، ’’کسی بھی عدالت کو کسی خاتون، خاص طور پر نابالغ لڑکی کو اس کی واضح مرضی کے خلاف پوری مدت تک حمل اٹھانے پر مجبور نہیں کرنا چاہیے۔ ایسا کرنا نہ صرف اس کی فیصلہ سازی کی آزادی کو نظرانداز کرنا ہوگا بلکہ اسے شدید ذہنی، جذباتی اور جسمانی صدمے سے بھی دوچار کرے گا۔‘

‘ بنچ کے مطابق، اگر راحت دینے سے انکار کیا جائے تو نابالغ کو ناقابلِ واپسی نتائج کا سامنا کرنا پڑے گا، جو تولیدی انتخاب کو بنیادی حق ماننے والے آئینی اصولوں کے خلاف ہے۔ عدالت نے واضح کیا کہ حاملہ خاتون کی خواہش کو ترجیح دی جانی چاہیے، نہ کہ پیدا ہونے والے بچے کے مفاد کو۔ بنچ نے کہا، ’’یہ کہنا آسان ہے کہ اگر خاتون بچے کی پرورش نہیں کرنا چاہتی تو اسے گود دے سکتی ہے، اس لیے اسے بچے کو جنم دینا چاہیے۔ لیکن یہ سوچ ان معاملات میں قابلِ قبول نہیں جہاں بچہ ناپسندیدہ ہو۔‘‘

عدالت نے کہا کہ ایسی صورتحال میں عورت کو اس کی مرضی کے خلاف بچے کو جنم دینے یا حمل جاری رکھنے کا حکم دینا اس کی فلاح و بہبود کو نظرانداز کرنے کے مترادف ہوگا۔ بنچ نے زور دیا کہ آئینی عدالتوں کو ایسے معاملات میں پیدا ہونے والے بچے کے بجائے حاملہ خاتون کے مفاد کو مدنظر رکھتے ہوئے حالات کا جائزہ لینا چاہیے۔

عدالت نے کہا، ’’آئینی عدالت کو تمام حقائق اور حالات کو اس فریق کے نقطہ نظر سے دیکھنا چاہیے جو حمل ختم کرانا چاہتی ہے اور طبی خطرہ مول لینے کو تیار ہے، نہ کہ اسے ناپسندیدہ بچے کو جنم دینے پر مجبور کرنا چاہیے۔‘‘ بنچ نے خبردار کیا کہ اگر عدالتیں ناپسندیدہ حمل جاری رکھنے پر زور دیں گی تو لوگ قانونی راستہ اختیار کرنے کے بجائے غیر قانونی مراکز کا رخ کریں گے، جس سے خواتین کی صحت کو زیادہ خطرہ لاحق ہوگا۔ سپریم کورٹ نے کہا کہ اس معاملے میں لڑکی کی عمر 15 سال ہے اور حمل ناپسندیدہ ہے، اس لیے اسے جاری رکھنا اس کے مفاد میں نہیں، خاص طور پر جب وہ دو بار خودکشی کی کوشش کر چکی ہے۔