نئی دہلی: دہلی میونسپل کارپوریشن (ایم سی ڈی) نے گرمیوں میں لُو کے اثرات کو کم کرنے کے لیے ایک ایڈوائزری جاری کرتے ہوئے اپنے تمام محکموں کو احتیاطی اقدامات کرنے کی ہدایت دی ہے۔ پیر کے روز جاری کردہ ایک سرکلر میں کارپوریشن نے کہا کہ طویل عرصے تک زیادہ درجہ حرارت میں رہنا صحت کے لیے سنگین خطرات پیدا کر سکتا ہے، خاص طور پر ان افراد کے لیے جو کام یا روزمرہ کی سرگرمیوں کے لیے باہر نکلتے ہیں۔

یہ ایڈوائزری دہلی ڈیزاسٹر مینجمنٹ اتھارٹی (ڈی ڈی ایم اے) کی جانب سے تیار کردہ ‘ہیٹ ویو ایکشن پلان-2026’ کے مطابق جاری کی گئی ہے۔ میونسپل کارپوریشن نے تمام زونز اور محکموں کو ہدایت دی ہے کہ دفاتر، اسکولوں، دواخانوں اور کمیونٹی ہالز میں ٹھنڈے پینے کے پانی، واٹر کولر، ایئر کنڈیشنر، ایئر کولر اور پنکھوں جیسی سہولیات کو یقینی بنایا جائے۔

اس کے ساتھ ہی بازاروں اور دیگر زیادہ بھیڑ والے علاقوں میں بھی ایسی سہولیات فراہم کرنے کا حکم دیا گیا ہے۔ سرکلر کے مطابق، صفائی کارکنوں اور مالیوں کو زندگی بچانے والا محلول (او آر ایس) کٹس تقسیم کی جائیں۔ اس کے علاوہ ٹھیکیدار کام کی جگہوں پر پینے کا پانی، سایہ دار جگہ اور او آر ایس فراہم کریں۔