جگدلپور/آواز دی وائس

مرکزی وزیرِ داخلہ امت شاہ نے پیر کے روز کہا کہ نكسل ازم  نے کبھی کسی معاشرے کو فائدہ نہیں پہنچایا اور جہاں بھی یہ موجود رہی، اس نے تباہی ہی پھیلائی۔ انہوں نے اس ضمن میں کولمبیا، پیرو اور کمبوڈیا جیسے ممالک کی مثالیں پیش کیں۔

شاہ نے چھتیس گڑھ کے بستر ضلع کے صدر مقام جگدلپور میں منعقدہ ’بستر پنڈم 2026‘ ثقافتی پروگرام کی اختتامی تقریب سے خطاب کرتے ہوئے ایک بار پھر کہا کہ 31 مارچ تک ملک سے نکسلواد کا مسئلہ مکمل طور پر ختم کر دیا جائے گا۔ انہوں نے نکسلیوں سے ہتھیار ڈال کر قومی دھارے میں شامل ہونے کی اپیل کی اور انہیں باعزت بازآبادکاری کی یقین دہانی کرائی۔ ان کا کہنا تھا كہ چھتیس گڑھ حکومت کی ماؤ نواز بازآبادکاری پالیسی سب سے زیادہ پرکشش ہے۔

امت شاہ نے اس بات پر تشویش کا اظہار بھی کیا کہ جو نکسلی اب بھی سرگرم ہیں، ان میں نوجوان قبائلی لڑکیاں بھی شامل ہیں۔ انہوں نے کہا كہ انہیں (نوجوان قبائلی لڑکیوں کو) بازآبادکاری کے لیے آگے آنا چاہیے، کیونکہ ان کے سامنے پوری زندگی پڑی ہے۔ انہوں نے ہتھیار ڈالنے والے نکسلیوں کو کسی قسم کا نقصان نہ پہنچانے کی یقین دہانی کراتے ہوئے خبردار کیا کہ جو لوگ فائرنگ جاری رکھیں گے، آئی ای ڈی نصب کریں گے اور اسکولوں و اسپتالوں کو آگ لگائیں گے، انہیں بخشا نہیں جائے گا۔

انہوں نے کہا كہ مسلح تشدد کا سخت جواب دیا جائے گا۔ اگر کوئی ہتھیار اٹھائے گا تو جواب بھی ہتھیاروں سے ہی دیا جائے گا۔

باقی مسلح نکسلیوں سے اپیل کرتے ہوئے امت شاہ نے کہا كہ ہم کسی سے لڑنا نہیں چاہتے۔ ہماری لڑائی اپنے قبائلی بھائیوں اور بہنوں کی حفاظت کے لیے ہے۔ جب آئی ای ڈی لگائی جاتی ہیں تو معصوم بچوں کی جان جا سکتی ہے یا وہ مستقل طور پر معذور ہو سکتے ہیں۔ یہ درندگی کہاں سے آتی ہے؟ انہوں نے کہا کہ ماؤ نوازوں نے دہائیوں تک اسکول بند رکھے، جس کے نتیجے میں کئی نسلیں تعلیم سے محروم رہیں اور بڑے پیمانے پر ناخواندگی پھیلی۔

امت شاہ نے کہا كہ تاہم اب بستر تیز رفتار ترقی کے راستے پر گامزن ہے۔ اسکول دوبارہ کھل رہے ہیں، سڑکیں بن رہی ہیں، موبائل ٹاور نصب کیے جا رہے ہیں، ڈاک خانے کھل رہے ہیں اور گاؤں گاؤں تک بجلی اور پینے کا پانی پہنچایا جا رہا ہے۔ ہمارا عزم ہے کہ آئندہ پانچ برسوں میں بستر ملک کا سب سے ترقی یافتہ قبائلی اکثریتی علاقہ بنے۔

انہوں نے بتایا کہ حکومت نے بستر خطے میں ترقی کو رفتار دینے کے لیے ایک بڑا روڈ میپ تیار کیا ہے، جس میں سات اضلاع شامل ہیں۔ اس کا مقصد دسمبر 2027 تک تمام دیہات کو بجلی سے جوڑنا، ہر گاؤں میں موبائل کنیکٹیویٹی یقینی بنانا اور ہر پانچ کلومیٹر کے دائرے میں ایک ڈاک خانہ یا بینک شاخ قائم کرنا ہے۔

امت شاہ نے کہا كہ قبائلی کسانوں سے دھان 3,100 روپے فی کوئنٹل کے حساب سے خریدا جائے گا، گھروں کو رسوئی گیس سلنڈر فراہم کیے جائیں گے اور ہر گھر میں نل کے ذریعے پانی کی فراہمی یقینی بنائی جائے گی۔ نکسلواد میں کمی کے ساتھ بستر کی معیشت کو فروغ دینے کے لیے ایڈونچر ٹورزم، ہوم اسٹے، کینوپی واک اور گلاس برج جیسی نئی سیاحتی پہلیں بھی تیار کی جا رہی ہیں۔

انہوں نے کہا کہ بستر میں قبائلی نوجوانوں کے لیے روزگار کے مواقع پیدا کرنے کے مقصد سے 118 ایکڑ پر نیا صنعتی علاقہ قائم کیا جا رہا ہے۔ آبپاشی منصوبوں کا ذکر کرتے ہوئے انہوں نے کہا کہ دریائے اندراوتی پر نئی اسکیمیں شروع کی جائیں گی، جن سے دانتیواڑہ، بیجاپور اور سکما اضلاع میں 2.75 لاکھ ہیکٹیئر زمین سیراب ہوگی اور 120 میگاواٹ بجلی بھی پیدا کی جائے گی۔

انہوں نے کہا كہ حکومت دہائیوں تک بستر کی ثقافت کے تحفظ کے لیے پُرعزم ہے۔ وزیر اعظم نریندر مودی کا ہدف بستر کی ثقافت کو پورے ملک اور دنیا تک پہنچانا ہے۔ بستر کی شناخت بندوق اور دھماکہ خیز مواد نہیں ہو سکتے، اس کی اصل شناخت اس کی ثقافت اور وراثت ہے۔ مرکزی وزیرِ داخلہ نے نکسلواد کے خلاف فیصلہ کن جدوجہد کے لیے چھتیس گڑھ پولیس، سینٹرل ریزرو پولیس فورس (سی آر پی ایف)، ہندوستان-تبت سرحدی پولیس (آئی ٹی بی پی) اور بارڈر سکیورٹی فورس (بی ایس ایف) کے جوانوں کا شکریہ ادا کیا اور شہید سکیورٹی اہلکاروں کے اہلِ خانہ کے لیے اپنے احترام اور قدردانی کا اظہار کیا۔

آخر میں امت شاہ نے ’بستر پنڈم 2026‘ کے انعقاد کی ستائش کرتے ہوئے کہا کہ اس پروگرام کی 12 مقابلہ جاتی سرگرمیوں میں سے ہر ایک کے تین بہترین فاتحین کو راشٹرپتی بھون مدعو کیا جائے گا، جہاں وہ اپنی فنکارانہ صلاحیتوں کا مظاہرہ کریں گے اور ضیافت میں شرکت کریں گے۔