نئی دہلی/ آواز دی وائس

احمد آباد میں ایئر انڈیا کے طیارہ حادثے کے بعد ہوائی کمپنیاں اس ہفتے شدید اتھل پتھل کا شکار رہیں۔ اس حادثے کے بعد سے تکنیکی خرابی، سیکیورٹی خطرات اور دیگر وجوہات کی بنیاد پر کئی پروازوں کو منسوخ یا کسی اور طرف موڑ دیا گیا۔ اس دوران ایئر انڈیا نے جمعہ کو 8 پروازیں منسوخ کر دیں، جن میں 4 بین الاقوامی اور 4 گھریلو پروازیں شامل ہیں۔ ایئرلائن نے پروازیں منسوخ کرنے کی وجہ دیکھ بھال اور آپریشنل مسائل کو بتایا ہے۔ اس سلسلے میں ایئر انڈیا نے ایک باضابطہ بیان جاری کر کے معلومات دی ہیں۔

ایئرلائن نے مسافروں کو مکمل ریفنڈ یا بغیر کسی اضافی فیس کے دوبارہ شیڈولنگ کی پیشکش کی ہے اور متبادل سفری منصوبوں کے ساتھ مسافروں کی مدد کی جا رہی ہے۔ بیان میں کہا گیا کہ ہمیں مسافروں کو ہوئی زحمت پر افسوس ہے۔ ہمارے زمینی عملے کے ساتھی انہیں جلد از جلد اپنی منزلوں تک پہنچانے کے لیے متبادل انتظامات کر رہے ہیں۔ مسافروں کو پرواز کی منسوخی پر مکمل ریفنڈ یا دوبارہ شیڈولنگ کی سہولت دی جا رہی ہے۔

ایئر انڈیا نے یہ پروازیں منسوخ کیں

دبئی سے چنئی - اے آئی906

دہلی سے میلبرن - اے آئی308

میلبرن سے دہلی - اے آئی309

دبئی سے حیدرآباد - اے آئی2204

پونے سے دہلی - اے آئی874

احمد آباد سے دہلی - اے آئی456

حیدرآباد سے ممبئی - اے آئی2872

چنئی سے ممبئی - اے آئی571

ایئرلائن نے مسافروں کے لیے ایڈوائزری جاری کی

ایئرلائن نے مسافروں کو مشورہ دیا ہے کہ وہ اپنی پرواز کی تازہ ترین صورتحال ایئر انڈیا کی ویب سائٹ پر دیکھیں یا اپڈیٹس کے لیے کسٹمر کیئر نمبر پر کال کریں۔ کمپنی نے بیان میں کہا کہ ہمارے طیاروں کی بڑھتی ہوئی جانچ، فضائی حدود پر پابندیوں اور خراب موسم کے باعث کچھ خلل پڑنے کا امکان ہے، جس کی مسافروں کو بروقت اطلاع دی جائے گی۔ مسافروں سے گزارش ہے کہ وہ اپنی پرواز کی معلومات ویب سائٹ  پر دیکھیں یا ہمارے کسٹمر کیئر نمبرز 011 69329333 یا 011 69329999 پر کال کریں۔

اس سے پہلے جمعرات کو ایئر انڈیا نے کہا تھا کہ وہ ہر ہفتے کئی بین الاقوامی راستوں پر پروازوں کو کم کرے گی اور 21 جون سے 15 جولائی 2025 تک تین روٹس پر پروازیں عارضی طور پر معطل کرے گی۔

احمد آباد حادثے کے بعد بحران میں ایئر انڈیا

ایئر انڈیا کی پروازیں مسلسل منسوخ ہو رہی ہیں۔ یہ سب ایک وسیع آپریشنل بحران کا حصہ ہے۔ ایئرلائن اب بھی احمد آباد-لندن گیٹوک ڈریم لائنر حادثے کے اثرات سے باہر نہیں آ سکی ہے۔ اس حادثے میں 271 افراد ہلاک ہو گئے تھے، جن میں کم از کم 30 ایسے افراد بھی شامل تھے جو زمین پر اپنی ڈیوٹی پر موجود تھے، کیونکہ طیارہ ایک گھنی آبادی والے علاقے پر گر گیا تھا۔ حادثے کے بعد، ڈائریکٹوریٹ جنرل آف سول ایوی ایشن (ڈی جی سی اے) نے ایئر انڈیا کے بوئنگ 787 طیاروں کے بیڑے کی مکمل سیکیورٹی جانچ کا حکم دیا تھا۔

ڈی جی سی اے کے اعداد و شمار کے مطابق، حادثے کے بعد سے اب تک 66 سے زائد ڈریم لائنر پروازیں منسوخ کی جا چکی ہیں۔ صرف 12 جون کو، ڈریم لائنر سے چلنے والی 50 پروازوں میں سے چھ منسوخ کر دی گئی تھیں۔ ریگولیٹری ادارے نے تصدیق کی تھی کہ 18 جون تک ایئر انڈیا کے 33 ڈریم لائنرز میں سے 24 کی جانچ مکمل ہو چکی ہے اور آئندہ دنوں میں مزید طیاروں کا معائنہ کیا جائے گا۔ دیکھ بھال کے مسائل کی وجہ سے دو جیٹس اس وقت دہلی میں (ائیر کرافٹ ان گراؤنڈ  کے طور پر درج ہیں۔