نئی دہلی/ آواز دی وائس

وزیرِ اعظم نریندر مودی ہر مہینے ریڈیو پروگرام ’من کی بات‘ میں ملک کے عوام سے گفتگو کرتے ہیں اور عوام سے جڑے موضوعات پر تبادلۂ خیال کرتے ہیں۔ اس پروگرام کا مقصد حکمرانی کے معاملات پر لوگوں سے رابطہ قائم کرنا ہے۔ اس پروگرام کے بارے میں ایک بڑی اطلاع سامنے آئی ہے۔

اطلاعات و نشریات کے وزیرِ مملکت ایل مروگن نے ایک سوال کے جواب میں جمعہ کو راجیہ سبھا میں بتایا کہ ریڈیو پروگرام ’من کی بات‘ سے آغاز سے اب تک 34.13 کروڑ روپے کی آمدنی ہوئی ہے۔ ایل مروگن نے بتایا کہ ’من کی بات‘ پروگرام آکاشوانی اپنے موجودہ وسائل سے تیار کرتا ہے اور اس پر کوئی اضافی خرچ نہیں آتا۔ وزیرِ اعظم مودی کا یہ پروگرام روایتی اور ڈیجیٹل دونوں ذرائع سے عوام تک پہنچتا ہے۔ ’من کی بات‘ کا پہلا نشریہ 3 اکتوبر 2014 کو ہوا تھا۔ وزیر نے بتایا کہ آکاشوانی کے وسیع نیٹ ورک کے ذریعے عوام کا ایک بڑا طبقہ اس پروگرام کو سنتا ہے۔

علاقائی زبانوں میں بھی نشریات

انہوں نے کہا کہ یہ پروگرام علاقائی زبانوں میں بھی نشر ہوتا ہے تاکہ اس کی رسائی ہر فرد تک یقینی ہو۔ اس کا نشریہ دوردرشن کے قومی اور علاقائی چینلز پر بھی کیا جاتا ہے۔ اس کے علاوہ، ڈی ڈی فری ڈش سے 48 آکاشوانی ریڈیو چینلز اور 92 نجی ٹی وی چینلز پر بھی یہ پروگرام نشر ہوتا ہے، جس کی وجہ سے یہ ملک کے کونے کونے میں سنا جا سکتا ہے۔

ایل مروگن نے مزید بتایا کہ ’من کی بات‘ کے ویژوئل فارمیٹ نے ناظرین کو جوڑنے اور اجتماعی گفتگو کا موقع فراہم کرنے میں مدد دی ہے۔ یہ پروگرام پی ایم او انڈیا ، پرسار بھارتی کے او ٹی ٹی پلیٹ فارم ویوز آکاشوانی، پرسار بھارتی کے یوٹیوب چینلز اور نیوز آن اے آئی آر موبائل ایپ پر بھی نشر ہوتا ہے۔

سوشل میڈیا پلیٹ فارمز پر بھی دستیاب

نیوز آن اے آئی آر‘ موبائل ایپ پر 260 سے زیادہ آکاشوانی چینلز موجود ہیں۔ ’من کی بات‘ پروگرام پرسار بھارتی کی نیوز فیڈ سروس ’پی بی شبد‘ پر بھی دستیاب ہے۔ اس کے علاوہ، پروگرام کو فیس بک، ایکس، انسٹاگرام سمیت کئی سوشل میڈیا پلیٹ فارمز پر بھی ملک اور دنیا بھر کے ناظرین سنتے اور دیکھتے ہیں۔