انتخابی عمل پر سوال اٹھاتے ہوئے ممتا بنرجی نے کہا کہ باہر سے کئی مبصرین آئے ہیں، اور بی جے پی جو کہتی ہے، وہی یہ کر رہے ہیں۔ ذرا دیکھئے، ہمارے تمام پوسٹر ہٹا دیے گئے ہیں۔ کیا ایسے انتخابات ہوتے ہیں؟ کچھ لوگوں کو حال ہی میں لایا گیا ہے اور وہ اپنی مرضی چلا رہے ہیں، وہ خوف و ہراس پھیلا رہے ہیں۔

ووٹ ڈالنے کے بعد انہوں نے صحافیوں کو اپنے موبائل میں ایک تصویر دکھاتے ہوئے کہا کہ دیکھئے، ہمارے کارکن کو رات میں کس طرح مارا گیا۔ اس ظلم کو دیکھئے۔ یہ کیسی غنڈہ گردی ہے؟ اس طرح ووٹنگ نہیں ہوتی۔ ووٹنگ پرامن طریقے سے ہوتی ہے، یہ جمہوریت کا تہوار ہے، لیکن انہوں نے اسے مکمل طور پر برباد کر دیا ہے۔ ان کی نیت بالکل صاف ہے کہ بی جے پی زبردستی انتخاب میں دھاندلی کرنا چاہتی ہے۔ ہمارے کارکن اور لوگ مرنے کو تیار ہیں، لیکن وہ اپنی جگہ نہیں چھوڑیں گے۔

مغربی بنگال کے انتخابات میں اس بار سب سے بڑا مسئلہ ایس آئی آر  بن کر سامنے آیا ہے۔ الیکشن کمیشن کی جانب سے ووٹر لسٹوں کے متنازع ایس آئی آر میں ووٹ دینے کا حق داؤ پر لگا ہوا ہے۔ ووٹ کا حق جمہوری نظام کی بنیاد اور آزاد و منصفانہ انتخابات کا وعدہ ہے، لیکن اس معاملے میں بنگال میں حالات پیچیدہ ہو گئے ہیں۔ موجودہ صورتحال میں باہمی ہمدردی اور یکجہتی کے امکانات ماضی کی کشیدہ اور الجھی ہوئی کہانیوں میں الجھ کر رہ گئے ہیں۔