نئی دہلی: وزیرِ اعظم نریندر مودی نے جمعرات کو کہا کہ کسان ملک کی غذائی سلامتی، غذائیت اور خوشحالی کی بنیاد ہیں اور حکومت ان کی زندگی آسان بنانے کے لیے ہر ممکن کوشش کر رہی ہے۔ وزیرِ اعظم نے کہا کہ پی ایم کسان سمان ندھی اور فصل بیمہ یوجنا جیسی اسکیمیں کسانوں کی آمدنی کو تحفظ فراہم کر رہی ہیں اور زرعی شعبے کو مضبوط بنا رہی ہیں۔
ان کے مطابق پی ایم کُسُم یوجنا کے ذریعے کسانوں کو آسانی سے شمسی توانائی دستیاب ہو رہی ہے، جس سے کاشتکاری کے اخراجات میں کمی آ رہی ہے۔ وزیرِ اعظم کے دفتر (پی ایم او) کی جانب سے جاری بیان کے مطابق مودی نے کہا کہ حکومت کسانوں کی فلاح و بہبود کو اپنی اعلیٰ ترین ترجیحات میں شامل رکھتی ہے اور اسی لیے انہیں جدید زرعی سہولتیں فراہم کرنے پر مسلسل توجہ دی جا رہی ہے۔
انہوں نے کہا کہ کسان کریڈٹ کارڈ کسانوں، مویشی پالنے والوں اور ماہی گیروں کو کم سود پر آسان قرض فراہم کرنے میں انتہائی مفید ثابت ہو رہا ہے، جبکہ "بیج سے بازار تک" مہم کے ذریعے فصلوں کی مناسب قیمت یقینی بنائی جا رہی ہے۔ مودی نے مزید کہا کہ ڈرون ٹیکنالوجی، مٹی کی صحت کے کارڈ اور قدرتی کھاد سے متعلق مہمات کسانوں کو پیداوار بڑھانے میں فعال طور پر مدد فراہم کر رہی ہیں۔ ان کے مطابق جدید ٹیکنالوجی اور نئی سہولتوں کے ذریعے زرعی شعبے کو مزید مضبوط اور منافع بخش بنانے کی کوشش جاری ہے۔
