نئی دہلی: آسٹریلیا کے شہر میلبرن میں مہاتما گاندھی کی 426 کلوگرام وزنی کانسی کی مورتی چوری ہو گئی ہے۔ یہ مورتی آسٹریلین انڈین کمیونٹی س ینٹر کے باہر نصب تھی اور بھارتی برادری کے لیے ثقافتی، تاریخی اور علامتی اہمیت رکھتی تھی۔ اس واقعے نے بھارتی-آسٹریلوی برادری میں شدید تشویش اور غصہ پیدا کر دیا ہے۔

بھارت نے اس معاملے کو سنجیدگی سے لیتے ہوئے آسٹریلوی حکام کے سامنے اٹھایا ہے اور فوری کارروائی کرتے ہوئے مورتی کی واپسی اور ذمہ دار افراد کی شناخت کا مطالبہ کیا ہے۔ وزارتِ خارجہ کے عہدیدار اور سرکاری ترجمان رندھیر جیسوال نے 3 فروری 2026 کو میڈیا سے بات کرتے ہوئے کہا: "ہم گاندھی جی کی مورتی کی توڑ پھوڑ اور چوری کی سخت مذمت کرتے ہیں۔

یہ مورتی میلبرن کے روول ویل میں واقع آسٹریلین انڈین کمیونٹی سینٹر میں نصب تھی۔ ہم نے آسٹریلوی حکام سے اپیل کی ہے کہ اس چوری کی فوری جانچ کی جائے، مورتی کو واپس لایا جائے اور قصورواروں کے خلاف قانونی کارروائی کی جائے۔" یہ مورتی نئی دہلی میں واقع انڈین کونسل فار کلچرل ریلیشنز (ICCR) کی جانب سے آسٹریلیا کو تحفے میں دی گئی تھی۔ اس کا افتتاح 12 نومبر 2021 کو اُس وقت کے آسٹریلوی وزیر اعظم اسکاٹ موریسن نے کیا تھا۔

تاہم افتتاح کے صرف 24 گھنٹوں کے اندر ہی نامعلوم افراد نے اس مورتی کے ساتھ توڑ پھوڑ کی تھی۔ میڈیا رپورٹس کے مطابق یہ واقعہ پیر کے روز تقریباً دوپہر 12:50 بجے پیش آیا۔ میلبرن پولیس کے مطابق، تین ملزمان نے مورتی کو اس کے فاؤنڈیشن سے کاٹنے کے لیے اینگل گرائنڈر کا استعمال کیا۔

سوشل میڈیا پر وائرل تصاویر میں مورتی کو ٹخنوں سے کٹا ہوا دیکھا جا سکتا ہے اور جائے وقوعہ پر اب صرف پاؤں کے باقیات موجود ہیں۔ مورتی کی چوری کی اطلاع ملنے کے بعد مقامی پولیس نے معاملے کی جانچ شروع کر دی ہے۔ فی الحال یہ واضح نہیں ہو سکا ہے کہ اس واردات کے پیچھے کون لوگ ہیں اور مورتی کہاں لے جائی گئی ہے۔ مہاتما گاندھی کی مورتی کے ساتھ اس طرح کا سلوک دونوں ممالک کے درمیان ثقافتی اور سفارتی تعلقات کے لیے ایک حساس مسئلہ بن گیا ہے۔ بھارتی برادری اور وزارتِ خارجہ نے اس معاملے میں فوری اور مؤثر اقدامات پر زور دیا ہے۔