چھندواڑہ: مدھیہ پردیش کے چھندواڑہ میں 9 بچوں کی موت کے بعد ریاستی حکومت نے بڑا قدم اٹھایا ہے۔ وزیراعلیٰ موہن یادو نے “کولڈرف” (Coldrif) کھانسی کے شربت کی فروخت پر پورے مدھیہ پردیش میں پابندی عائد کر دی ہے۔ اس افسوسناک واقعے نے پوری ریاست کو جھنجھوڑ کر رکھ دیا ہے۔

حکومت نے فوری کارروائی کرتے ہوئے شربت بنانے والی کمپنی اور اس کے دیگر مصنوعات کی جانچ شروع کر دی ہے۔ وزیراعلیٰ موہن یادو نے سخت لہجے میں کہا، ’’چھندواڑہ میں کولڈرف شربت کے سبب بچوں کی موت نہایت افسوسناک ہے۔ اس شربت کی فروخت پر پورے مدھیہ پردیش میں پابندی لگا دی گئی ہے۔‘‘ انہوں نے مزید کہا کہ شربت تیار کرنے والی کمپنی کے دیگر مصنوعات کی فروخت پر بھی روک لگائی جا رہی ہے۔

اس شربت کی تیاری تمل ناڈو کے کانچی پورم میں واقع ایک فیکٹری میں کی جاتی ہے۔ یادو نے بتایا کہ چونکہ فیکٹری کانچی پورم میں ہے، اس لیے واقعے کے فوراً بعد ریاستی حکومت نے تمل ناڈو حکومت سے تحقیقات کا مطالبہ کیا تھا۔ آج صبح اس کی رپورٹ موصول ہوئی، جس کی بنیاد پر سخت کارروائی کی گئی ہے۔

وزیراعلیٰ نے کہا کہ بچوں کی المناک موت کے بعد مقامی سطح پر کارروائی پہلے ہی شروع کر دی گئی تھی، اور ریاستی سطح پر بھی ایک اعلیٰ سطحی تحقیقاتی ٹیم تشکیل دی گئی ہے۔ انہوں نے یقین دلایا کہ قصورواروں کو کسی بھی صورت معاف نہیں کیا جائے گا۔ اس معاملے پر مرکزی وزارت صحت نے بھی بیان جاری کیا ہے۔

وزارت کے مطابق، مرکزی ادویہ معیار کنٹرول تنظیم (CDSCO) کی جانب سے لیے گئے 6 نمونوں میں ڈائی ایتھلین گلائکول (DEG) یا ایتھلین گلائکول (EG) کی موجودگی نہیں پائی گئی۔ تاہم، مدھیہ پردیش کے ایف ڈی اے (فوڈ اینڈ ڈرگ ایڈمنسٹریشن) کے ذریعے لیے گئے 13 نمونوں میں سے 3 کی جانچ میں بھی DEG یا EG موجود نہیں تھا۔ لیکن جب تمل ناڈو ایف ڈی اے نے کانچی پورم میں واقع Sresan Pharma سے کولڈرف شربت کے نمونے لیے، تو 3 اکتوبر 2025 کو جاری رپورٹ میں DEG کی مقدار مقررہ حد سے زیادہ پائی گئی۔

معاملے کی سنگینی کو دیکھتے ہوئے، ملک بھر میں 19 دوا ساز کمپنیوں کی مینوفیکچرنگ سائٹس پر جانچ شروع کر دی گئی ہے۔ یہ جانچ “رسک بیسڈ انسپیکشن” (Risk-Based Inspection) کے تحت کی جا رہی ہے تاکہ ادویات کے معیار میں کسی قسم کی خامی نہ رہ جائے۔

اس کے ساتھ ہی، نیشنل انسٹی ٹیوٹ آف وائرولوجی (NIV)، آئی سی ایم آر (ICMR)، نیری (NEERI)، سی ڈی ایس سی او (CDSCO) اور ایمس ناگپور (AIIMS Nagpur) کے ماہرین پر مشتمل ایک بین الوزارتی ٹیم چھندواڑہ اور آس پاس کے علاقوں میں پہنچ چکی ہے۔ یہ ٹیم بچوں کی اموات کے اصل اسباب کا پتہ لگانے میں مصروف ہے۔

چھندواڑہ کا یہ واقعہ ایک بار پھر ادویہ ساز کمپنیوں کے معیارِ تیاری اور کنٹرول نظام پر سنگین سوال کھڑا کرتا ہے۔ ریاستی اور مرکزی حکومت دونوں سطحوں پر تحقیقات جاری ہیں، اور آنے والے دنوں میں اس معاملے پر مزید اہم انکشافات متوقع ہیں۔