نئی دہلی : سپریم کورٹ نے 2003 کے مشہور مدھومیتا شکلا قتل کیس میں ایک مجرم کی قبل از وقت رہائی سے متعلق درخواست پر غور کرتے ہوئے کہا ہے کہ نظامِ انصاف میں "توجہ اصلاح پر ہونی چاہیے، نہ کہ صرف سزا دینے پر۔" جسٹس بی وی ناگراتنا اور جسٹس اجول بھوئیاں پر مشتمل بینچ نے مرکزی وزارت داخلہ کے 9 جولائی 2025 کے اس حکم کو منسوخ کر دیا جس میں مجرم روہت چترویدی کی قبل از وقت رہائی کے لیے اتراکھنڈ حکومت کی سفارش مسترد کر دی گئی تھی۔

عدالت نے نوٹ کیا کہ چترویدی بغیر کسی رعایت کے 22 سال قید کاٹ چکے ہیں۔ عدالت نے ریمارکس دیے، "جرم ایک چیز ہے، اصلاح دوسری۔ توجہ اصلاح پر ہونی چاہیے، نہ کہ صرف سزا پر۔" سپریم کورٹ نے یہ بھی کہا کہ چترویدی پہلے ہی ضمانت پر رہا ہیں اور انہیں دوبارہ سرینڈر کرنے کی ضرورت نہیں ہے۔ یہ کیس شاعرہ مدھومتا شکلا کے قتل سے متعلق ہے، جنہیں 9 مئی 2003 کو لکھنؤ کی پیپر مل کالونی میں اس وقت قتل کیا گیا تھا جب وہ حاملہ تھیں۔

اس وقت کے یوپی کے سابق وزیر امرمانی ترپاٹھی پر اس قتل کا الزام لگا، جنہیں ستمبر 2003 میں گرفتار کیا گیا تھا۔ بعد میں قتل کی سازش کے الزام میں دیگر افراد کو بھی گرفتار کیا گیا۔ اترکھنڈ کی نچلی عدالت نے 24 اکتوبر 2007 کو امرمانی ترپاٹھی، ان کی اہلیہ مدھومانی ترپاٹھی، رشتہ دار روہت چترویدی اور ساتھی سنتوش کمار رائے کو عمر قید کی سزا سنائی تھی۔

امرمانی ترپاٹھی نوٹنووا سے رکن اسمبلی رہے اور وہ اترپردیش میں بی جے پی اور 2002 کی بہوجن سماج پارٹی حکومت میں وزیر بھی رہے۔ وہ سماج وادی پارٹی سے بھی وابستہ رہے۔ تحقیقات 17 جون 2003 کو سی بی آئی کے حوالے کی گئی تھیں۔

سپریم کورٹ نے فروری 2007 میں مقدمہ اترپردیش سے اترکھنڈ منتقل کیا تھا۔ 2012 میں ہائی کورٹ نے سزا برقرار رکھی اور 2013 میں سپریم کورٹ نے بھی اس فیصلے کی توثیق کی۔ اترپردیش جیل محکمہ نے 24 اگست 2023 کو سزاؤں میں نرمی کی پالیسی کے تحت امرمانی ترپاٹھی اور مدھومانی ترپاٹھی کی قبل از وقت رہائی کا حکم دیا تھا۔ روہت چترویدی نے بعد میں اتراکھنڈ حکومت کے سامنے بھی قبل از وقت رہائی کی درخواست دائر کی تھی۔