نئی دہلی: بھارت میں مردم شماری کے سلسلے میں خود شمار (سیلف اینومریشن) پورٹل پر دیے گئے اکثر پوچھے جانے والے سوالات (FAQ) میں کہا گیا ہے کہ اگر لِیو اِن (بلا نکاح ساتھ رہنے والے) تعلق میں رہنے والے دو افراد ایک دوسرے کو ہمیشہ کے لیے اپنا مانتے ہیں تو مردم شماری کے دوران انہیں شادی شدہ جوڑے کے برابر تصور کیا جائے گا۔

مردم شماری کے دوران خود شمار کا اختیار منتخب کرنے والوں کے لیے پورٹل کھول دیا گیا ہے۔ یہ پورٹل مردم شماری کے دونوں مراحل، یعنی ‘ہاؤس لسٹنگ اور ہاؤسنگ مردم شماری’ (LLO) اور آبادی کی مردم شماری کے لیے دستیاب ہوگا۔ پورٹل پر اکثر پوچھے جانے والے سوالات کی فہرست دی گئی ہے تاکہ لوگ ملک کی 16ویں مردم شماری کے دوران پوچھے جانے والے سوالات کے جوابات آسانی سے دے سکیں۔

ایف اے کیو میں کہا گیا ہے: کیا لِو اِن تعلق میں رہنے والے جوڑے کو شادی شدہ جوڑا مانا جائے گا؟ اگر وہ ایک دوسرے کو ہمیشہ کے لیے اپنا مانتے ہیں، تو انہیں شادی شدہ جوڑے کے طور پر تصور کیا جائے گا۔ حکومت نے یکم اپریل 2026 سے شروع ہونے والے مردم شماری کے پہلے مرحلے (ہاؤس لسٹنگ اور ہاؤسنگ مردم شماری) کے دوران لوگوں سے پوچھے جانے والے 33 سوالات کو نوٹیفائی کیا ہے۔

پہلے مرحلے میں پوچھے جانے والے سوالات میں گھر کے فرش اور چھت میں استعمال ہونے والے مواد، وہاں رہنے والے شادی شدہ جوڑوں کی تعداد، خاندان کے سربراہ کی جنس، استعمال کیے جانے والے اناج کی قسم، بنیادی اور جدید سہولیات تک رسائی، اور ملکیت میں موجود گاڑیوں کی اقسام شامل ہوں گی۔

سوالات کا آغاز عمارت نمبر (بلدیہ یا مقامی ادارے یا مردم شماری نمبر)، مردم شماری مکان نمبر، اور گھر کے فرش، دیوار اور چھت میں استعمال ہونے والے اہم مواد کے بارے میں پوچھنے سے ہوگا۔ اس کے بعد شمار کنندہ گھر کے استعمال، اس کی حالت، اور اس میں عام طور پر رہنے والے افراد کی تعداد کے بارے میں سوالات کرے گا۔ حکام خاندان کے سربراہ کے نام اور صنفی شناخت سے متعلق معلومات بھی جمع کریں گے۔