نئی دہلی: دہلی کے وزیر ماحولیات منجیندر سنگھ سرسا نے جمعہ کو کہا کہ دارالحکومت میں جاری بڑے شجرکاری مہم کا مقصد فضائی آلودگی پر قابو پانا ہے۔ اس کے تحت مقامی درختوں کی ایسی اقسام لگائی جا رہی ہیں جو ہوا کو صاف رکھنے میں مددگار ہیں اور کم پانی میں بھی نشوونما پاتی ہیں۔ ون مہوتسو 2026 کے تحت دہلی پولیس کی جانب سے منعقدہ شجرکاری مہم سے خطاب کرتے ہوئے سرسا نے دعویٰ کیا کہ ان مقامی پودوں کی بقا کی شرح 97 سے 99 فیصد ہے۔

انہوں نے کہا کہ ہر پودے کو ٹیگ کیا جائے گا اور ہر شجرکاری مقام کو جیو ٹیگ کیا جائے گا تاکہ ان کی مسلسل نگرانی کی جا سکے۔ انہوں نے بتایا کہ اس سال دہلی بھر میں 70 لاکھ درخت لگائے جائیں گے، جن میں سے 15 لاکھ درخت دہلی رج (Ridge) کے جنگلاتی علاقے میں لگائے جائیں گے۔

یہ منصوبہ مرکزی وزیر داخلہ امت شاہ کے تصور کردہ 10 سالہ گرین ماسٹر پلان کا حصہ ہے۔ سرسا نے کہا کہ رج کے جنگلات کی بحالی کے لیے مقامی درختوں کی شجرکاری کی جا رہی ہے، جو صاف ہوا فراہم کرنے، آلودگی کم کرنے اور پانی کی بچت میں معاون ثابت ہوں گے۔

انہوں نے کہا کہ فضائی آلودگی دہلی کا سب سے بڑا مسئلہ ہے، اس لیے حکومت جہاں بھی زمین دستیاب ہے، وہاں شجرکاری کے ذریعے سبزہ بڑھانے کی کوشش کر رہی ہے۔ وزیر ماحولیات نے بتایا کہ روایتی شجرکاری کے ساتھ ساتھ شہر بھر میں میاواکی جنگلات بھی تیار کیے جا رہے ہیں۔ جاپانی ماہر نباتات ڈاکٹر اکیرا میاواکی کے تیار کردہ اس طریقۂ کار کے ذریعے کم وقت میں گھنے جنگلات اگائے جا سکتے ہیں۔

سرسا نے کہا کہ گزشتہ سال کی شجرکاری مہم میں سپریم کورٹ اور دہلی ہائی کورٹ کے ججوں، تقریباً 70 ممالک کے سفیروں، مرکزی وزیر داخلہ امت شاہ اور مختلف سرکاری محکموں کے افسران نے شرکت کی تھی۔ انہوں نے رہائشی فلاحی انجمنوں، مندروں، گردواروں اور دیگر سماجی اداروں سے بھی اس مہم میں بڑھ چڑھ کر حصہ لینے کی اپیل کی۔

وزیر ماحولیات نے کچرے کے انتظام کا ذکر کرتے ہوئے کہا کہ دہلی میں تقریباً 202 ایکڑ پر پھیلے پرانے کچرے کے ڈھیر موجود ہیں، جن میں سے گزشتہ ڈیڑھ سال کے دوران کئی ایکڑ زمین کو صاف کرکے قابل استعمال بنایا گیا ہے اور ان مقامات پر بھی درخت لگائے جا رہے ہیں۔

انہوں نے بتایا کہ دہلی میں روزانہ تقریباً 13 ہزار میٹرک ٹن نیا شہری کچرا پیدا ہوتا ہے، جبکہ 30 سے 35 ہزار میٹرک ٹن پرانے کچرے کو بھی روزانہ پراسیس کیا جاتا ہے۔ اس طرح روزانہ تقریباً 50 ہزار میٹرک ٹن کچرے کو سنبھالا جا رہا ہے۔ سرسا نے کہا کہ دہلی پولیس اور ٹریفک پولیس کی مؤثر ٹریفک انتظامیہ کی بدولت کچرا لے جانے والی گاڑیوں کی آمدورفت میں آسانی رہی، جس سے عوام کو پریشانی کے بغیر بڑے پیمانے پر کچرے کی صفائی ممکن ہو سکی۔