نئی دہلی: ہندوستان میں مصنوعی ذہانت (اے آئی) کے شعبے کے سامنے سب سے بڑا چیلنج بڑی ٹیکنالوجی کمپنیوں کا مارکیٹ پر غلبہ یا امتیازی رویہ نہیں، بلکہ ماہر افرادی قوت اور ڈیٹا کے معیاری بنانے کی کمی ہے۔ بدھ کے روز جاری ایک رپورٹ میں یہ بات کہی گئی۔

پالیسی ریسرچ ادارے ’دی ڈائیلاگ‘ کی جانب سے ہندوستان میں اے آئی کے منظرنامے پر جاری رپورٹ کے مطابق ہندوستان کا اے آئی شعبہ تیزی سے ترقی اور توسیع کے دور سے گزر رہا ہے، لیکن ماہر افراد کی کمی اور ڈیٹا کے استعمال سے متعلق رکاوٹیں اس کی ترقی کو متاثر کر رہی ہیں۔ رپورٹ تیار کرنے کے لیے مجموعی طور پر 308 اسٹارٹ اپ کمپنیوں، کاروباری صارفین اور صارفین کے درمیان سروے کیا گیا۔

اس میں 47.2 فیصد شرکاء نے ماہر افرادی قوت کی دستیابی کو مسابقت کے لیے ایک بڑی رکاوٹ قرار دیا۔ صارفین کی سطح پر اے آئی کو اپنانا بھی اتنا ہی بڑا چیلنج سامنے آیا۔ ’دی ڈائیلاگ‘ کی سینئر پروگرام منیجر بھومیکا اگروال نے کہا، ’’اے آئی کی مسابقتی صلاحیت کے لیے ماہر افرادی قوت کی دستیابی ایک اہم رکاوٹ بن رہی ہے۔ اے آئی سسٹمز کو تیار کرنے، تربیت دینے، نافذ کرنے اور بڑے پیمانے پر استعمال کرنے کے لیے خصوصی مہارت کی ضرورت ہوتی ہے۔‘

‘ رپورٹ کے مطابق تقریباً 63.2 فیصد اے آئی ڈیولپرز نے ڈیٹا کے معیاری بنانے کی کمی کو سب سے بڑا چیلنج قرار دیا۔ یہ تعداد کاپی رائٹ سے متعلق خدشات (44 فیصد) اور ڈیٹا کی کمی (42 فیصد) سے کہیں زیادہ ہے۔ سرکاری ڈیٹا تک رسائی بھی کافی محدود ہے۔ صرف 15 فیصد شرکاء نے کہا کہ حکومت کے پاس دستیاب ڈیٹا آسانی سے قابل رسائی ہے۔ رپورٹ میں ہندوستان کے اے آئی شعبے میں اوپن سورس ماڈلز اور ٹولز پر بہت زیادہ انحصار کی بھی نشاندہی کی گئی ہے۔

اے آئی اسٹارٹ اپس اور ڈیولپرز میں سے 96.2 فیصد نے کسی نہ کسی شکل میں اوپن سورس ماڈلز یا ٹولز استعمال کرنے کی بات کہی، جبکہ 62.3 فیصد نے اس پر اپنے انحصار کو ’اعلیٰ‘ سطح کا قرار دیا۔ رپورٹ کے مطابق اے آئی شعبے میں مسابقت بڑھانے کے لیے صرف بڑی کمپنیوں کے مارکیٹ رویے پر توجہ دینا کافی نہیں ہوگا، بلکہ ماہر افرادی قوت اور مفید و معیاری ڈیٹا کی دستیابی میں اضافہ کرنا بھی ضروری ہے۔