آواز دی وا ئس

 محمد عارف کے ہاتھ میں پکڑی سوئی ایک ہموار اور مسلسل انداز میں چل رہی ہے۔ وہ گلابی رنگ کے باریک کپڑے کو لکڑی کے چوکھٹے پر کس کر اس میں ریشمی دھاگہ پرو رہے ہیں۔ ان کی نظریں سوئی پر جمی ہوئی ہیں اور چوکھٹے کے گرد بیٹھے پانچ دیگر کاریگر بھی پوری یکسوئی سے اپنے کام میں مصروف ہیں۔

یہ مسلمان کاریگر ایک ایسے لہنگے پر کڑھائی کر رہے ہیں جسے ریشمی اور دھاتی دھاگوں سے سجایا جائے گا۔ اس پر مختلف نقش و نگار کے ساتھ قیمتی پتھر اور نگینے بھی جڑے جائیں گے۔

عارف بتاتے ہیں کہ یہ لہنگا رادھا رانی کے لیے تیار کیا جارہا ہے اور اسے جنم اشٹمی سے کافی پہلے پہنچانا ضروری ہے۔

برسوں سے  مسلمان کاریگر ہندو مذہبی روایات کی ظاہری شان و شوکت میں خاموشی سے اپنا حصہ ڈال رہے ہیں۔ ان کے ہاتھ بانکے بہاری اور رادھا رانی کے لیے تیار کیے جانے والے دیدہ زیب ملبوسات سے لے کر لڈو گوپال یعنی بھگوان کرشن کی طفلانہ صورت کے لیے بنائے جانے والے ننھے لباس اور دیگر آرائشی سامان تک تیار کرتے ہیں

 جنم اشٹمی کا تہوار قریب آتے ہی ان کاریگروں کی دکانوں اور ورکشاپس میں کام کی رفتار بھی تیز ہوجاتی ہے۔ عقیدت مندوں اور مندروں کی جانب سے دیے گئے آرڈرز کو تہوار کی تقریبات شروع ہونے سے پہلے مکمل کرنا ضروری ہوتا ہے۔عارف اور ان کے ساتھی جس لہنگے پر کڑھائی کر رہے ہیں وہ رادھا کے لیے تیار کیا جارہا ہے۔ برج کی روایتی مذہبی روایت میں رادھا کو بھگوان کرشن کی محبوبہ اور ان کی عقیدت سے جڑی داستانوں کا مرکزی کردار مانا جاتا ہے۔ورنداون کے متھرا گیٹ کے آس پاس متعدد مسلم گھرانوں اور چھوٹی چھوٹی ورکشاپس میں یہی منظر دیکھنے کو ملتا ہے جہاں کاریگر مل جل کر دیوتاؤں کے ملبوسات تیار کرتے ہیں۔ وہ لڈو گوپال کے لیے پٹکے اور دیگر لباس تیار کرتے ہیں جبکہ رادھا رانی اور دوسرے دیوتاؤں کے لیے لہنگے چنریاں اور اوڑھنیاں بناتے ہیں۔

ایک کاریگر بتاتے ہیں کہ ہم لڈو گوپال رادھا رانی اور دیگر دیوتاؤں کے لیے لباس تیار کرتے ہیں۔ عقیدت مند یہ ملبوسات دیوتاؤں کو چڑھانے کے لیے خریدتے ہیں۔ تہواروں اور خصوصی مواقع پر مندروں اور گھروں میں رکھی مورتیوں کو سجانے کے لیے بھی ان ملبوسات کا استعمال کیا جاتا ہے۔

اتر پردیش کے برج خطے کے جڑواں شہر متھرا اور ورنداون ہندو مذہبی اور ثقافتی روایات میں منفرد مقام رکھتے ہیں۔ روایتی طور پر متھرا کو بھگوان کرشن کی جائے پیدائش مانا جاتا ہے جبکہ ورنداون ان کے بچپن اور جوانی سے وابستہ ہے۔ خاص طور پر کرشن اور رادھا سے جڑی چرواہی اور عقیدت کی داستانوں میں ورنداون کو مرکزی حیثیت حاصل ہے۔

 خطے میں ہر سال لاکھوں عقیدت مند اور سیاح آتے ہیں۔ یہاں کے مندر اپنی مذہبی رسومات اور موسیقی کے ساتھ ساتھ دیوتاؤں کی دیدہ زیب سجاوٹ کے لیے بھی مشہور ہیں۔ یہی وجہ ہے کہ مندروں اور گھروں میں عبادت کے دوران خصوصاً تہواروں کے موقع پر مورتیوں کو نئے اور خوبصورت ملبوسات پہنانا مذہبی روایت کا ایک اہم حصہ سمجھا جاتا ہے۔

ان خصوصی ملبوسات کا ایک بڑا حصہ مقامی کاریگر تیار کرتے ہیں۔ ان کے ہنر اور فن کی روایت نسل در نسل منتقل ہوتی رہی ہے۔

ان کاریگروں میں ایک بڑی تعداد مسلمانوں کی بھی ہے۔

عارف بتاتے ہیں کہ ہم ان ملبوسات کی تیاری میں بہت محنت کرتے ہیں۔ دراصل فیروزآباد سمیت آس پاس کے کئی علاقوں سے بھی بہت سے مسلمان کاریگر ورنداون آتے ہیں اور یہاں ملبوسات پر کڑھائی کا کام کرتے ہیں۔

 کاریگروں کے مطابق ورنداون اور متھرا کے وسیع علاقے میں تقریباً 3,000 مسلمان ایسے ملبوسات کی تیاری اور ان پر کڑھائی کے کام سے وابستہ ہیں۔ یہ ملبوسات نہ صرف مقامی بازاروں میں فروخت ہوتے ہیں بلکہ دہلی اور جے پور جیسے شہروں تک بھی پہنچتے ہیں۔ بعض ملبوسات بیرون ملک مقیم عقیدت مندوں اور ہندوستانی برادریوں کو بھی بھیجے جاتے ہیں جن میں دبئی اور امریکہ بھی شامل ہیں۔

شاہ رخ گزشتہ تقریباً 13 برس سے اس ہنر سے وابستہ ہیں۔ ان کے لیے اس کام کی وجہ کوئی پیچیدہ بات نہیں۔

وہ کہتے ہیں کہ یہ ہمارا کام ہے اور اسی سے ہمارا روزگار وابستہ ہے۔

اس ہنر سے خواتین بھی وابستہ ہیں تاہم کاریگروں کا کہنا ہے کہ اس وقت مردوں کی تعداد زیادہ ہے۔

ان کاریگروں کے لیے گاہک کا مذہبی پس منظر اہم نہیں بلکہ ملبوسات تیار کرنے کا ہنر اور کام کی مہارت زیادہ اہمیت رکھتی ہے۔ ان کے ہاتھوں سے تیار ہونے والے ملبوسات آخرکار ہندو مذہبی رسومات کا حصہ بن جاتے ہیں۔ انہیں مندروں میں دیوتاؤں کی مورتیوں کو پہنایا جاتا ہے یا عقیدت مند انہیں اپنے گھروں میں مورتیوں کو چڑھاتے ہیں۔

ان کاریگروں اور ان کے آس پاس موجود زیادہ تر ہندو خریداروں کے درمیان تعلق کم از کم ان ورکشاپس میں زیادہ تر کاروباری نوعیت کا اور خوش گوار دکھائی دیتا ہے۔

رادھا رانی کے لیے چنری تیار کرنے والے ایک اور کاریگر کہتے ہیں کہ تمام دکانیں ہندوؤں کی ہیں جبکہ کاریگر مسلمان ہیں۔ ہم دکانداروں اور تھوک فروشوں کے آرڈر پر کام کرتے ہیں۔

تقریباً 17 برس سے اس پیشے سے وابستہ غیر مسلم کاریگر موہن سنگھ کہتے ہیں کہ ان کے زیادہ تر ساتھی مسلمان ہیں اور مذہبی اختلافات کی وجہ سے کبھی ان کے درمیان کوئی تنازع نہیں ہوا۔

وہ کہتے ہیں کہ ہم سب مل جل کر امن کے ساتھ کام کرتے ہیں۔

مسلمان کاریگر بھی کہتے ہیں کہ انہیں اپنے مذہب کی وجہ سے کبھی امتیازی سلوک کا سامنا نہیں کرنا پڑا۔

ایک کاریگر کا کہنا ہے کہ ہم سب ہندو اور مسلمان بھائیوں کی طرح رہتے ہیں۔ جب میں تیار کیا ہوا سامان دکاندار تک پہنچانے جاتا ہوں تو وہ میرے ساتھ اچھا برتاؤ کرتا ہے۔

یہ باہمی میل جول ایسے شہر میں خاص طور پر قابل توجہ ہے جہاں ہندو مذہبی زندگی ہر طرف نمایاں نظر آتی ہے۔ ورنداون کرشن کے کئی معروف مندروں کا مرکز ہے جبکہ بڑے مندروں اور مذہبی مقامات کے آس پاس مساجد بھی موجود ہیں۔

ان کاریگروں کا کام اس باہمی میل جول کی ایک زیادہ قریب سے نظر آنے والی تصویر پیش کرتا ہے۔ یہ کسی بڑے اعلان یا رسمی دعوے پر نہیں بلکہ روزگار ہنر کی نسل در نسل منتقلی اور روزمرہ کے معاشی تعلقات پر قائم ہے۔

تاہم اس ہنر کو ایک ایسے چیلنج کا سامنا ہے جس کا مذہب سے کوئی تعلق نہیں۔ وہ چیلنج ہے کم معاوضہ۔

کاریگروں کو خدشہ ہے کہ اگر اجرت میں اضافہ نہ کیا گیا اور بدلتے ہوئے بازار کی ضروریات کے مطابق اس ہنر میں تبدیلی نہ لائی گئی تو ہاتھ سے کڑھائی کا یہ روایتی فن شاید اگلی نسل تک زندہ نہ رہ سکے۔

 اس کام میں مہارت رکھنے والے کاریگروں کو روزانہ صرف 300 روپے اجرت ملتی ہے جبکہ ایک مزدور کو 700 روپے یومیہ دیے جاتے ہیں۔ عارف کہتے ہیں کہ ہنرمند ہونے کے باوجود ہمیں اتنی کم اجرت ملتی ہے۔موہن سنگھ بھی ایک دوسرے زاویے سے اسی تشویش کا اظہار کرتے ہیں۔ تقریباً 17 برس سے اس پیشے سے وابستہ موہن کو یہ کام پسند ہے لیکن ان کا کہنا ہے کہ کم آمدنی کی وجہ سے ان کے بچے اس پیشے کو اختیار کرنے کے لیے تیار نہیں ہیں۔

یہ تشویش اس لیے بھی اہم ہے کہ اس ہنر میں خاصی محنت اور وقت درکار ہوتا ہے۔ مشین سے تیار ہونے والے ملبوسات کے برعکس ہاتھ کی باریک کڑھائی میں نقش و نگار اور سجاوٹ کی نوعیت کے لحاظ سے کئی گھنٹے بلکہ بعض اوقات کئی دن بھی لگ جاتے ہیں۔

ایک اور کاریگر یامین اس پورے عمل کی وضاحت کرتے ہوئے کہتے ہیں کہ سب سے پہلے مکھن جیسے شفاف کاغذ پر نقشہ بنایا جاتا ہے۔ اس کے بعد اسے کپڑے پر منتقل کیا جاتا ہے۔ کڑھائی کے لیے ریشم کے ساتھ چاندی یا سونے کی تہہ چڑھے دھاگے استعمال کیے جاتے ہیں۔ عموماً چار یا پانچ کاریگر مل کر ایک ملبوسے پر کام کرتے ہیں اور اس کی تیاری میں لگنے والا وقت نقش و نگار کی نوعیت پر منحصر ہوتا ہے۔

اس پورے عمل میں نقشہ سازی سے لے کر ڈیزائن کو کپڑے پر منتقل کرنے کڑھائی اور آرائش تک کئی مراحل شامل ہوتے ہیں۔ بڑے تہواروں کے موقع پر یہ ملبوسات خاص طور پر دیدہ زیب بنائے جاتے ہیں کیونکہ مندروں اور عقیدت مندوں کی جانب سے دیوتاؤں کے لیے نئے اور خوبصورت لباس کی طلب بڑھ جاتی ہے۔

  کاریگروں کے لیے یہ کام محض روزگار کا کوئی انوکھا شعبہ نہیں بلکہ برج کی معیشت اور ثقافتی زندگی میں رچا بسا ایک روایتی ہنر ہے۔

ان کے ہاتھ ہندو مذہب کی محبوب ترین شخصیات میں سے ایک سے وابستہ ملبوسات تیار کرتے ہیں جبکہ ان کی اپنی مذہبی شناخت مسلمان کی ہے۔ تاہم ان ورکشاپس کے اندر سوئی دھاگہ نقش و نگار اور مقررہ وقت اس مذہب سے زیادہ اہم دکھائی دیتے ہیں جس سے وہ شخص تعلق رکھتا ہے جو بالآخر یہ لباس پہنے گا یا زیادہ درست طور پر اس دیوتا کے لیے یہ لباس تیار کیا جارہا ہے۔

جنم اشٹمی قریب آ رہی ہے اور عارف اور ان کے ساتھیوں کی نظریں اب بھی کپڑے پر چلتی باریک سوئی کے کام پر جمی ہوئی ہیں۔

یہ رنگ برنگا لہنگا بالآخر لکڑی کے چوکھٹے سے نکل کر کسی دکاندار یا عقیدت مند کے ہاتھوں تک پہنچے گا اور پھر صدیوں پر محیط عقیدت سے جڑے ایک تہوار کا حصہ بن جائے گا۔

لیکن جن کاریگروں کے ہاتھوں نے اسے تیار کیا ہے ان کے لیے یہ لباس اس بات کی یاد دہانی بھی ہے کہ روایات اکثر ایسے ہاتھوں کے ذریعے زندہ رہتی ہیں جن کا تصور شاید کم ہی کیا جاتا ہے اور ہنر اپنے اندر بقائے باہمی کی ایک ایسی زبان پیدا کرسکتا ہے جسے کسی وضاحت یا اعلان کی ضرورت نہیں ہوتی